చిరంజీవి, రామ్ చరణ్ క‌ల‌సి స్టెప్పు వేస్తే ఎలా ఉంటుందో మ‌గ‌ధీర‌లో చూశాం. కాక‌పోతే.. అక్క‌డ రాజమౌళి మార్క్ గ్రాఫిక్స్ మాయే డామినేట్ చేసింది. ఘ‌రానా మొగుడు సినిమాలోని బంగారు కోడి పెట్ట‌లో చిరు వేసిన స్టెప్పుల్ని క‌ట్ పేస్ట్ చేశారు. దాంతో చిరు, చరణ్ క‌ల‌సి ఒకే ఫ్రేములో డాన్స్ వేస్తే చూసే ఛాన్స్ ద‌క్క‌లేదు. అయితే ఆ లోటు `ఖైది నంబ‌ర్ 150` తీర్చ‌బోతోంది. ఈ చిరంజీవి 150వ చిత్రానికి రామ్ చరణ్ నిర్మాత‌గా వ్య‌వ‌హ‌రిస్తున్న సంగ‌తి తెలిసిందే. ‘డాడీ 150వ సినిమాలో నాక్కూడా క‌నిపించాల‌ని వుంది’ అంటూ చరణ్ కూడా త‌న మ‌న‌సులోని మాట చాలా సంద‌ర్భాల్లో బ‌య‌ట‌పెట్టాడు. ఇప్పుడు ఆ క‌ల‌ని, కోరిక‌ని నిజం చేసుకొన్నాడు. చిరు సినిమాలో చరణ్ ఎంట్రీ జ‌రిగిపోయింది. ఓ పాట‌లో చిరుతో క‌ల‌సి చరణ్ స్టెప్పులేశాడ‌ని స‌మాచారం.
చిరు సినిమా అంటే సిగ్నేచ‌ర్ స్టెప్పుల‌కు ప్ర‌సిద్ది. ఇంద్ర‌లో వీణ స్టెప్పు గురించి చిరు అభిమానులు ఇప్ప‌టికీ గొప్ప‌గా చెప్పుకొంటారు. చిరు 150వ సినిమాలోనూ ఇలాంటి సిగ్నేచ‌ర్ స్టెప్పులు ఉన్నాయ‌ట. చిరు, చరణ్ లు క‌ల‌సి వీణ స్టెప్పులాంటిదొక‌టి వేశార‌ని, ఈ సినిమాలో ఆ స్టెప్పు చాలా స్పెష‌ల్ అని స‌మాచారం. ఖైది నెం.150 ఆడియో ఫంక్ష‌న్‌లో చరణ్ ఎంట్రీ గురించి అధికారికంగా చెప్పే అవ‌కాశం ఉంది. అన్న‌ట్టు ఖైది నెం. 150 ఆడియో ఫంక్ష‌న్‌ని చాలా గ్రాండ్ గా చేయాల‌ని చిత్ర‌బృందం భావిస్తోంది. రోబో 2 ఫ‌స్ట్ లుక్ వేడుక ఇటీవ‌ల ముంబైలో జ‌రిగింది. ఆ పోగ్రాం కోసం స‌రికొత్త టెక్నాల‌జీ ఉప‌యోగించారు. సేమ్ టూ సేమ్ ఆ టైపులోనే చిరు ఆడియో ఫంక్ష‌న్ నిర్వహించాల‌ని చూస్తున్నారు. రెగ్యుల‌ర్ ఆడియో ఫంక్ష‌న్‌ల‌లో సుమ, లేదంటే ఝాన్సీల‌ను యాంక‌ర్లుగా చూస్తుంటాం. అయితే ఈ కార్య‌క్ర‌మానికి ఓ స్పెష‌ల్ యాంక‌ర్ రాబోతున్నాడ‌ట. అత‌నెవ‌రు అనేది ఆస‌క్తిక‌రంగా మారింది. మొత్తానికి చిరు రీ ఎంట్రీ ఇస్తున్న ఈ సినిమా ఆడియో ఫంక్ష‌న్ వెరైటీగా చేయ‌బోతున్నార‌న్న‌మాట.
