గత రెండు మూడు దశాబ్ధాలుగా హీరోయిక్ బిల్డప్పుల సినిమాలకు పట్టంకట్టిన ప్రేక్షకుల్లో అభిరుచుల్లో గత రెండు సంవత్సరాల నుంచీ స్పష్టమైన మార్పు కనిపిస్తోంది. హీరోల భజన చేసే డైలాగ్స్, బిల్డప్స్, ఫైట్స్‌లాంటి హంగామా కంటే కూడా కంటెంట్‌కే పట్టం కడుతున్నారు ప్రేక్షకులు. ఏ స్టార్ హీరో నటించాడు? అనే విషయం కంటే కూడా సినిమాలో విషయం ఉందా? లేదా? అనే విషయానికే ప్రాధాన్యత ఇస్తున్నారు. సినిమాలో విషయం ఉంటే పెళ్ళిచూపులు, బిచ్చగాడు, క్షణంలాంటి సినిమాలను కూడా బ్లాక్ బస్టర్ హిట్స్ చేసేస్తున్నారు. కంటెంట్ మిస్సయితే బ్రహ్మోత్సవం, సర్దార్‌లాంటి సినిమాలకు కూడా రెండో షోకే ప్రేక్షకులు కరువవుతున్నారు. ఈ విషయం మన స్టార్ హీరోలకు కూడా అర్థమైంది. కానీ ఇప్పటికిప్పుడు పూర్తిగా మారిపోయి తారే జమీన్ పర్, క్షణం, కార్తికేయ లాంటి సినిమాల్లో పాత్రధారులుగా మారిపోవడం చాలా కష్టం. అంతటి యాక్టింగ్ స్కిల్స్ కూడా మనవాళ్ళకు ఉన్నాయో లేవో తెలియదు.

అందుకే మధ్యే మార్గంగా హీరోయిజంతో పాటు కథ కూడా ఉండేలా సిినిమాలు ప్లాన్ చేసుకుంటున్నారు. ఇప్పుడు అలాంటి డైరెక్టర్స్‌కి డిమాండ్ బాగా పెరిగిపోయింది. అందులోనూ కంటెంట్‌తో అన్ని వర్గాల ప్రేక్షకులనూ థియేటర్‌కి రప్పిస్తున్న డైరెక్టర్స్ చుట్టూ హీరోలే తిరుగుతున్నారు. ఇప్పుడు కొరటాల శివ, త్రివిక్రమ్ శ్రీనివాస్‌లు ఆ ఫేజ్‌లోనే ఉన్నారు. ఇద్దరూ కూడా ప్రస్తుతం మహేష్, పవన్‌లతో సినిమాలు చేస్తూ ఉన్నప్పటికీ వాళ్ళ తర్వాత సినిమాలలో హీరోలుగా యాక్ట్ చేసే అవకాశం కోసం ఎన్టీఆర్, చరణ్‌లు గట్టి ప్రయత్నాలు చేస్తున్నారు. కంప్లీట్ మేకోవర్ ఎక్స్‌పెక్ట్ చేస్తున్న చరణ్ అయితే సుకుమార్ తర్వాత వరుసగా కొరటాల శివ, త్రివిక్రమ్ శ్రీనివాస్‌లతో సినిమాలు ఉండేలా ప్లాన్ చేసుకుంటున్నాడు. ధృవ సినిమాతో ఎంతో కొంత మార్పు చూపించిన చరణ్ ఇక సుకుమార్, కొరటాల శివ, త్రివిక్రమ్ శ్రీనివాస్‌లతో వరుసగా సినిమాలు చేశాడంటే మాత్రం నటుడిగా, స్టార్‌గా టాప్ రేంజ్‌కి వెళ్ళిపోవడం ఖాయం. అలాగే టెంపర్, నాన్నకు ప్రేమతో, జనతా గ్యారేజ్ సినిమాలతో అన్ని వర్గాల ప్రేక్షకులకూ రీచ్ అవడంతో పాటు ఇమేజ్ మేకోవర్ విషయంలో గ్రాండ్ సక్సెస్ అయిన ఎన్టీఆర్ కూడా త్రివిక్రమ్‌తో సినిమా కోసం వెయిట్ చేస్తున్నాడు. కంప్లీట్ అర్బన్ బేస్డ్ ఫ్యామిలీ కథలో ఇప్పటి వరకూ ఎన్టీఆర్ కనిపించింది లేదు. బృందావనం సినిమా కూడా ఎక్కువ శాతం యాక్షన్ ఎపిసోడ్స్‌నే నమ్ముకుంది. అందుకే త్రివిక్రమ్ స్టైల్‌లో ఉండే ఓ మంచి లవ్ అండ్ ఫ్యామిలీ ఎంటర్టైనర్‌లో కనిపించాలని ఆశిస్తున్నాడు ఎన్టీఆర్. ప్రస్తుతం బాబీ, సుకుమార్‌లతో సినిమాలు చేస్తున్న ఎన్టీఆర్, చరణ్‌ల నెక్ట్స్ సినిమాలు ఏ డైరెక్టర్స్‌తో ఉంటాయో చూడాలి మరి. ఏది ఏమైనా స్టార్ హీరోలందరూ కూడా డైరెక్టర్స్ చుట్టూ తిరగడం మాత్రం తెలుగు సినిమా ఇండస్ట్రీకి మంచి పరిణామమే.