చిత్ర‌సీమ‌లో ఎప్పుడు ఏం కాంబినేష‌న్ సెట్ట‌యిపోతుందో చెప్ప‌లేం! ఎలాంటి హ‌డావుడి లేకుండా కొన్ని సినిమాలు సెట్ అయిపోతుంటాయి. ‘ఇదిగో అదిగో’ అంటూ ఊరించిన సినిమాలు ఎప్ప‌టికీ ప‌ట్టాలెక్క‌వు. హ‌డావుడిగా ఓ క‌థ‌ని ఓకే చేయించుకొని, అంతే స్పీడుగా సినిమాని తీసేయ‌డంలో పూరి జ‌గ‌న్నాథ్ దిట్ట. మ‌రోసారి అదే ఫీట్ రిపీట్ చేసే అవ‌కాశాలు క‌నిపిస్తున్నాయి. ‘ఇజం’ తరవాత చ‌డీ చ‌ప్పుడు చేయ‌లేదు పూరి. ఆయ‌న్నుంచి కొత్త సినిమా క‌బుర్లేం వినిపించ‌లేదు. ఇప్పుడు స‌డ‌న్‌గా వెంక‌టేష్‌కి ఓ క‌థ చెప్ప‌డం, ఆయ‌న ఓకే చేసేయ‌డం జ‌రిగిపోయాయ‌ని ఇండ్ర‌స్ట్రీ వ‌ర్గాల టాక్‌. ఇటీవ‌ల వెంకీని క‌లిసిన పూరి.. ఓ క‌థ వినిపించార‌ట. ఆ క‌థ పూరి గ‌త సినిమాల‌కంటే చాలా భిన్నంగా ఉండ‌డంతో వెంకీ వెంట‌నే ఓకే చెప్పేశార‌ని తెలుస్తోంది.
గురు తరవాత ‘ఆడాళ్లూ మీకు జోహార్లూ’ సినిమా ఉండ‌బోతోంద‌ని ప్ర‌చారం బాగా సాగింది. కిషోర్ తిరుమ‌ల వెంకీ కోసం క‌థ సిద్ధం చేయ‌డం, దాన్ని ప‌ట్టాలెక్కించ‌డానికి అన్ని ఏర్పాట్లూ జ‌రుగుతుండ‌గా సురేష్ బాబు స‌డ‌న్‌గా అడ్డుపుల్ల వేశాడ‌న్న విష‌యం బ‌య‌ట‌కు వ‌చ్చింది. గురు తరవాత మొద‌ల‌వ్వాల్సిన ఆడాళ్లూ మీకు జోహార్లూ సినిమాకి స‌డ‌న్ బ్రేకులు ప‌డ్డాయి. ఆ స్థానంలో పూరి సినిమాని ఓకే చేశాడ‌ట వెంకీ. అంటే.. గురు తరవాత మొద‌ల‌య్యేది పూరి సినిమానే అన్న‌మాట. 2017 ఫిబ్ర‌వ‌రిలో వెంకీ – పూరి సినిమా ప‌ట్టాలెక్కే అకాశం ఉంది.
