మ‌ణిర‌త్నం సినిమా అంటే ఓ అటెన్ష‌న్ మొద‌లైపోతుంది. ఆయ‌న్నుంచి డిజాస్ట‌ర్లు రావొచ్చు కాక…. కానీ ఎప్ప‌టికీ అదే ఉత్సుక‌త సృష్టించుకోగ‌ల‌రు. తాజాగా ‘చెలియా’పై కూడా భారీ అంచ‌నాలున్నాయి. ఈ సినిమాని తెలుగులో దిల్ రాజు విడుద‌ల చేయ‌డం వ‌ల్ల తెలుగులోనూ భారీ రిలీజ్ కి అవ‌కాశం ద‌క్కింది. ట్రైల‌ర్లు, పాట‌లు ఊరిస్తున్నాయి. మ‌రి సినిమా మాటేంటి?? ఎలా ఉండ‌బోతోంది??
‘రోజా’ టైప్ టిపిక‌ల్ క‌థ ఇద‌ని తెలుస్తోంది. ప్రేమ, దేశ‌భ‌క్తి స‌మ‌పాళ్ల‌లో మేళ‌వించారు మ‌ణిర‌త్నం. ఆయ‌న తీసిన ఏ ల‌వ్ స్టోరీ అయినా ఫెయిల్ కాలేదు. దేశ‌భ‌క్తి పాయింట్ కూడా ఆయ‌న అద్భుతంగా తెర‌కెక్కిస్తారు. అందుకే.. ఈ సంగమం స‌క్సెస్‌ని తీసుకొస్తుంద‌ని మ‌ణిర‌త్నం అభిమానులు గ‌ట్టిగా న‌మ్ముతున్నారు. అంతేకాదు.. ఈసినిమా చూసిన కొంత‌మంది సీనీ ప్ర‌ముఖులు ‘చెలియా అద్భుతంగా ఉంది.. మ‌ణి మ‌రోసారి మ్యాజిక్ చేయ‌బోతున్నార’అంటూ హింట్స్ ఇస్తున్నారు. దాంతో ‘చెలియా’పై అంచ‌నాలు మ‌రింత పెరిగాయి.
‘చెలియా’ ప్ర‌మోష‌న్లు త‌మిళ‌నాట భారీగా జ‌రుగుతున్నాయి. అక్క‌డితో పోలిస్తే తెలుగు తేలిపోయింది. దిల్‌రాజుపై న‌మ్మ‌కంతో ఈ సినిమా అప్ప‌గించారు మ‌ణిర‌త్నం. ‘ఓకే బంగారం’ సినిమాని దిల్‌రాజు ప్ర‌మోట్ చేసిన విధానం మ‌ర్చిపోలేం. దిల్‌రాజు మార్కెటింగ్ వ్యూహాల వ‌ల్లే.. త‌మిళంలో కంటే తెలుగులో మంచి వ‌సూళ్లు ద‌క్కాయి. అయితే ఈసారి ‘చెలియా’ ప్ర‌మోష‌న్లు అంత‌గా క‌నిపించ‌డం లేదు. భార్యా వియోగంతో సినిమాల్ని ప‌క్క‌న పెట్టారు దిల్‌రాజ. ఆయ‌న యాక్టివ్‌గా లేని లోటు స్ప‌ష్టంగా క‌నిపిస్తోంది. రాజు త‌మ్ముళ్లు శిరీష్‌, ల‌క్ష్మ‌ణ్ రంగంలోకి దిగినా.. ప్ర‌మోష‌న్ల‌లో స్పీడు లేదు. నిజానికి ఈ వారం తెలుగు లో ఈ సినిమాని అతిక‌ష్ట‌మ్మీద విడుద‌ల చేస్తున్నార్ట. ఈ వారం విడుద‌ల కాక‌పోతే.. ‘బాహుబ‌లి 2’ విడుద‌లైన 15 రోజుల వ‌రకూ ఎదురుచూడాల్సిందే. పైగా తెలుగు, త‌మిళం రెండు చోట్లా ఒకే డేట్ ఫిక్స్ చేయ‌డం వ‌ల్ల ఈనెల 7న విడుద‌ల చేయ‌డం త‌ప్ప‌డం లేదు.
