త‌న త‌దుప‌రి సినిమా టైటిల్ విష‌యంలో ప్ర‌భాస్ ఏమాత్రం నిరీక్ష‌ణ‌లో పెట్ట‌లేదు. బాహుబ‌లి త‌ప్ప మ‌రో ఊసు తెలీని, త‌న ఫ్యాన్స్ కోస‌మైనా కాస్త దూకుడు ప్ర‌ద‌ర్శించాల్సివ‌చ్చింది. అందుకే టైటిల్‌, ఫ‌స్ట్ లుక్‌, టీజ‌ర్… ఇలాంటి విష‌యాల్లో కాస్త తొంద‌ర తొంద‌ర‌గానే ఉన్నాడు. సుజిత్‌తో సినిమా ఇలా మొద‌లైందో లేదో, ఇలా టైటిల్ బ‌య‌ట‌కు వ‌చ్చేసింది. త‌న సినిమాకి ‘సాహో’ అనే టైటిల్ ఫిక్స్ చేశాడు ప్ర‌భాస్‌. టైటిల్ లోగా, పోస్ట‌ర్ కూడా బ‌య‌ట‌కు వ‌చ్చింది. సాహో అనే అక్ష‌రాల‌తో ప్ర‌భాస్ పోస్ట‌ర్‌ని మ‌లిచారు. ప్ర‌భాస్ ఫ్యాన్స్‌కి అదిరిపోయేలా అనిపిస్తోందా పోస్ట‌ర్‌. టీజ‌ర్‌ని కూడా బాహుబ‌లి 2 సినిమాతో క‌లిపి చూపించ‌బోతున్నారు.

ఈ సినిమాని వీలైనంత త్వ‌ర‌గా ముగించి విడుద‌ల చేయాల‌న్న‌ది ప్ర‌భాస్‌ప్లాన్‌. ఈ యేడాదే సాహో విడుద‌లయ్యే ఛాన్సులు పుష్క‌లంగా ఉన్నాయి. యువీ క్రియేష‌న్స్ ఈ చిత్రాన్ని రూ.150 కోట్ల భారీ వ్య‌యంతో మ‌లుస్తోంది. బాహుబ‌లికి ముందైతే… ఈ బ‌డ్జెట్ ఎవ్వ‌రూ ఊహించ‌లేనిది. బాహుబ‌లి ఇచ్చిన ధైర్యంతో నిర్మాత‌లు ముంద‌డుగు వేస్తున్నారు. పైగా తెలుగుతో పాటు త‌మిళ‌, హిందీ భాష‌ల్లోనూ ఈ సినిమాని విడుద‌ల చేయాల‌నుకోవ‌డం `సాహో`కి క‌లిసొచ్చే విష‌య‌మే.