బాహుబ‌లి రికార్డుల వేట మొద‌లైంది. అనుకొన్న‌ట్టే టాలీవుడ్ తొలిరోజు వ‌సూళ్ల‌లో చ‌రిత్ర సృష్టించింది. మొద‌టి రోజు ఏకంగా రూ.42 కోట్ల‌పైచిలుకు వ‌సూలు చేసి కొత్త రికార్డ్ త‌న పేరిట లిఖించింది బాహుబ‌లి 2. ఇది వ‌ర‌కు కూడా బాహుబ‌లి 1దే రికార్డు. దాన్ని సంక్రాంతికి వ‌చ్చిన ఖైదీ నెం.150 చెరిపేసింది. మూడు నెల‌లు గ‌డిచాయో లేదో.. ఇప్పుడు బాహుబ‌లి 2 వ‌చ్చి ఆ రికార్డుకి చ‌మ‌ర‌గీతం పాడేసింది. నైజాంలోనే బాహుబ‌లికి దాదాపు తొమ్మిది కోట్లు ద‌క్కిన‌ట్టు తెలుస్తోంది. ప్రభాస్ ఫ్యాన్స్ బ‌లంగా ఉన్న తూగో, పగో జిల్లాలు క‌లిపి దాదాపు రూ.12 కోట్లు తెచ్చుకొంది బాహుబ‌లి. గురువారం రాత్రి షోలు వేయ‌డంతోపాటు, తొలిరోజునే 5 ఆట‌లు న‌డ‌ప‌డం బాహుబ‌లికి బాగా క‌లిసొచ్చింది. ప్ర‌పంచ వ్యాప్తంగా తొలి రోజు ఎంత సాధించింది అనే విష‌యంలో ఇంకా లెక్క‌లు తేల‌లేదు. ఈ సాయంత్రానిక‌ల్లా ఆ వివ‌రాలు అందే అవ‌కాశం ఉంది.