టీడీపీ సీనియ‌ర్ నేత కంభంపాటి రామ్మోహ‌న్ జగన్ యాత్ర‌ను ఎద్దేవా చేశారు. జగన్ ని చూసి శశికళ, కర్ణాటకలో గాలి జనార్దన్ రెడ్డిలు కూడా పాదయాత్రలు చేస్తార‌ని ఎద్దేవా చేశారు.
కంభంపాటి రామ్మోహ‌న్ మాట్లాడుతూ “ఏ1 ముద్దాయిగా ఉన్న జగన్ పాదయాత్ర చేసేందుకు సిద్ధ‌మ‌వ‌డాన్ని చూసి ప్ర‌జ‌లు న‌వ్వుకుంటున్నారు .జగన్ స్ఫూర్తితో త‌మిళనాడులో శశికళ, కర్ణాటకలో గాలి జనార్దన్ రెడ్డిలు కూడా పాదయాత్రలు చేస్తార‌ని” ఎద్దేవా చేశారు. ప్ర‌త్యేక హోదా కోసం వైసిపి ఎంపీలు రాజీనామాలు చేస్తామ‌ని గ‌తంలో జగన్ ప్ర‌క‌టించార‌న్న కంభంపాటి, ముందు వైసీపీ ఎంపీలు ఎప్పుడు రాజీనామాలు చేస్తారో జగన్ ప్ర‌క‌టించాల‌ని చెప్పారు. తండ్రి అధికారాన్ని అడ్డంపెట్టుకుని కూడబెట్టిన అక్రమాస్తులన్నింటినీ ప్రజలకు అప్పగించిన తర్వాతే పాదయాత్ర చేయాల‌ని డిమాండ్ చేశారు.
అయితే వైసిపి నేత అంబటి రాంబాబు స్పందిస్తూ, “యాత్ర చేయరాదని టిడిపి నేతలు చేస్తున్న వితండవాదం చూస్తుంటేనే జగన్ యాత్రకి వారెంత భయపడుతున్నారో తెలుస్తోంది” అంటూ స్పందించారు. యాత్ర దగ్గరయ్యేకొద్దీ మాటల తూటాలు మరింత పేలే అవకాశముంది.
