హైదరాబాద్: తమిళనాడులో సినిమా తారలకు గుడి కట్టటం అప్పుడప్పుడూ చూస్తూ ఉంటాము. ఎంజీఆర్‌కు, హీరోయిన్‌లు కుష్బూ, నమితకు అక్కడ గుడికట్టిన అభిమానులు ఉన్నారు. రాజకీయ నాయకులకు గుడులు కట్టటం అరుదు. ఆ మధ్య వైఎస్‌కు గుడికట్టినట్లు వార్త వచ్చింది. ఇటీవల ప్రధాని నరేంద్రమోడికి గుజరాత్‌లో ఓ వీరాభిమాని గుడికట్టాడని అన్నారు. మహాత్మాగాంధికి నల్గొండజిల్లా చిట్యాలలో గుడి ఉంది. అదేకోవలో ఇప్పుడు ఆంధ్రప్రదేశ్ ముఖ్యమంత్రి చంద్రబాబు నాయుడుకుకూడా గుడి నిర్మిస్తున్నారు. ఏపీ రాజధాని అమరావతి ప్రాంతంలో – గుంటూరుజిల్లా తుళ్ళూరు మండలం ఉద్దండరాయునిపాలెంలో బాబుకు గుడికట్టాలని రాజధాని రైతులు నిర్ణయించారు. దీనికి ఈనెల 22న శంకుస్థాపన చేయాలని ఏర్పాట్లు చేస్తున్నారు. ఈ కార్యక్రమానికి ఏపీ మంత్రులందరూ వస్తారని తెలుస్తోంది. తమ గ్రామాన్ని రాజధానిగా చేసిన చంద్రబాబును దేవుడిలా భావిస్తున్నామని గ్రామ రైతులు చెప్పారు. ఇందుకు బాబుకు జీవితకాలం రుణపడి ఉంటామని అన్నారు. అందుకే గుడి కట్టాలని నిర్ణయించామని రైతులు తెలిపారు.