నిఖిల్, నందిత జంటగా నటిస్తున్న ‘శంకరాభరణం’ సినిమా టీజర్ నిన్న విడుదలయింది. ఈ సినిమాని చాలా లో-బడ్జెట్ లో నిర్మిస్తున్నారు. కనుక అందుకు తగ్గట్టుగానే టీజర్ విడుదల చాలా సింపుల్ గా కానీ చాలా వెరైటీగా చేసారు. ఈ సినిమాకి కధ అందించిన ప్రముఖ రచయిత కోన వెంకట్ అభ్యర్ధనను మన్నించి పవన్ కళ్యాణ్ తన సినిమా సెట్స్ లోనే ఈ టీజర్ ని విడుదల చేసారు. పవన్ కళ్యాణ్ అంత పెద్ద హీరో ఏమాత్రం బేషజం లేకుండా తన సినిమా సెట్స్ లోనే వేరొక చిన్న సినిమా టీజర్ ని విడుదల చేసి తన ఔనత్యాన్ని మరోమారు చాటుకొన్నారని హీరో నిఖిల్ ట్వీటర్ లో పవన్ కళ్యాణ్ పై ప్రశంశలు కురిపించారు. నిఖిల్ తన ఆనందం వ్యక్తం చేస్తూ, “ఇప్పుడే పవర్ స్టార్ పవన్ కళ్యాణ్ న్ని సర్దార్ సెట్స్ మీద కలుసుకొన్నాను. నా ఆనందాన్ని కొద్దిపాటి మాటలలో వ్యక్తం చేయలేను. అంత గొప్ప, అంత పెద్ద నటుడు అంత నిరాడంబరంగా అంత మర్యాదగా వ్యవహరించడం చూస్తుంటే నమ్మలేకపోయాను. టీజర్ రిలీజ్ చేసిన తరువాత పవన్ కళ్యాణ్ నన్ను ఆప్యాయంగా కౌగలించుకొన్నారు. నా ఆనందాన్ని మాటలలో చెప్పలేను. ఆయనకు కృతజ్ఞతలు తెలియజేయడానికి కేవలం ‘థాంక్స్’ అనే పదం ఒక్కటే సరిపోదు,” అని ట్వీట్ నిఖిల్ చేసారు.
ఈ సినిమాకి కే. విశ్వనాథ్ దర్శకత్వం వహించిన శంకరాభరణం సినిమాకి ఒక్క పేరులో తప్ప మరేవిధంగా సంబంధం, పోలికా లేదు. ఈ కొత్త శంకరాభరణం సినిమా బీహార్ బ్యాక్ డ్రాప్ లో నిర్మించిన కామెడీ క్రైం థ్రిల్లర్. ఈ సినిమాతో ఉదయ్ నందనవనం దర్శకుడుగా పరిచయం అవుతున్నారు. ప్రముఖ నిర్మాణ సంస్థ ఎం.వి.వి. బిల్డర్స్ అధినేత ఎం.వి.వి. సత్యనారాయణ ఈ సినిమాను నిర్మిస్తున్నారు. ఈ సరికొత్త ‘శంకరాభరణం’లో అంజలి అతిధి పాత్రలో, సంపత్ రాజ్, బ్రహ్మానందం, రావు రమేష్, సప్తగిరి తదితరులు ముఖ్య పాత్రల్లో నటిస్తున్నారు. ఈ సినిమాని వచ్చే నెలలో విడుదల చేసేందుకు ఏర్పాట్లు చేసుకొంటున్నారు.
[youtube http://www.youtube.com/watch?v=4Oohz_ySuCE&w=853&h=480]
