హైదరాబాద్: 51 ఏళ్ళ ఇటాలియన్ ప్రౌఢ నటి మోనికా బెల్లూస్సి ఒక కొత్త రికార్డ్ సృష్టించబోతున్నారు. ఇప్పటివరకు రూపొందిన 24 జేమ్స్‌బాండ్ చిత్రాలలో హీరోయిన్గా నటించిన నటీమణులందరిలో పెద్దదిగా రికార్డులలోకెక్కబోతున్నారు. ఈ నెల 26న ప్రపంచవ్యాప్తంగా విడుదలవుతున్న స్పెక్ట్ర్‌లో డేనియల్ క్రెగ్ సరసన హీరోయిన్గా మోనికా నటించారు.
మన హీరోయిన్‌లు నిద్రలో లేపి సడన్‌గా అడిగినా వయస్సు చెప్పరు. కానీ హాలీవుడ్‌లోమాత్రం వయస్సు దాచుకోవటం ఉండదు. వయస్సును బాహాటంగా ప్రకటిస్తారు. 50 ఏళ్ళ వయసులో కూడా హీరోయిన్‌లుగా ప్రేక్షకులను అలరిస్తారు. ప్రముఖ నటీమణులు ఎలిజబెత్ హర్లీకి 50, హేల్లీ బెర్రీకి 49, జెన్నిఫర్ అనిస్టన్‌కు 46, జూలియా రాబర్ట్స్‌కు 48, నికొల్ కిడ్‌మన్‌కు 48, సల్మాహయెక్‌కు 49, శాండ్రా బుల్లక్‌కు 51, జోడీ ఫాస్టర్‌కు 52 ఏళ్ళు ఉన్నాయి. ఈ వయసులోకూడా వీరు తమ శరీర సౌష్ఠవాన్ని చక్కగా మెయింటెయిన్ చేయటం ఒక విశేషం. మోనికా కూడా ఈ కోవలోనివారే. మామూలుగా జేమ్స్‌బాండ్ చిత్రాలలో హీరోయిన్‌లను బాండ్ గాళ్ అని పిలుస్తారు. తాను బాండ్ గాళ్ అనే పదానికి సరిపోయేంత చిన్నదానినికాదని, తనను బాండ్ వుమన్ అని పిలవమని మోనికా కోరారు.
