హైదరాబాద్: తెలుగు ఎంటర్‌టైన్‌మెంట్ టీవీ రంగంలో ఓంకార్‌ది ఒక భిన్నమైన శైలి. ఎంతమంది వెక్కిరించినా, విమర్శలు చేసినా అదే శైలితో అతను అనేక విజయాలు సాధించాడు. తర్వాత సినిమా రంగంలోకి… అదీ నేరుగా దర్శకత్వ విభాగంలోకి ప్రవేశించాడు. మొదట ‘జీనియస్’ అనే సినిమాను రూపొందించాడు. అది ఫెయిలయింది. అయినా నిరుత్సాహపడకుండా ఈసారి స్వీయనిర్మాణంలో ‘రాజుగారి గది’ అనే చిత్రాన్ని రూపొందించాడు. ఇటీవల బాగా విజయవంతమైన కామెడీ థ్రిల్లర్ జోనర్‌లో ఈ చిత్రాన్ని తెరకెక్కించాడు. ఈ చిత్ర ట్రైలర్ భిన్నంగా, టాలీవుడ్‌లోని అనేక మంది ప్రముఖులతో బైట్‌లతో రూపొందించటం విశేషం. ఈ సందర్భంగా వివిధ మీడియా సంస్థలకిచ్చిన ఇంటర్వ్యూలలో తనపై అనేక సినిమాలలో, స్టేజ్‌షోలలో వచ్చిన సెటైర్‌లపై ఓంకార్ స్పందించాడు. తన శైలిని పేరడీ చేయటాన్ని తనకు లభిస్తున్న గౌరవంగా భావిస్తానని చెప్పాడు. ప్రముఖ హీరోల శైలినే సినిమాల్లో పేరడిగా చేస్తారు కాబట్టి ఈ విషయాన్ని సరదాగా తీసుకుంటానన్నాడు. రాజుగారి గది చిత్రంలో నటించిన కమెడియన్‌లు షకలక శంకర్, ధన్‌రాజ్ ఈ చిత్రం షూటింగ్‌లో ఎన్నోసార్లు తనను అనుకరిస్తూ కామెడీ స్కిట్‌లు చేశారని చెప్పాడు.