విన్నింగ్ కాంబినేషన్ కాస్తా, ఓటమికి కేరాఫ్ అడ్రస్ గా మారుతోంది. లోక్ సభ ఎన్నికల్లో ఘన విజయం సాధించిన మోడీ, ఇప్పుడు పార్టీని గెలిపించలేకపోతున్నారు. యూపీలో అద్భుతాలు చేసిన అమిత్ షా వ్యూహ చతురత వెలవెలబోతోంది. ఢిల్లీ తర్వాత బీహార్లోనూ ఈ జోడీ బీజేపీని గెలపించలేకపోయింది.

బీహార ప్రచారంలో ఎటు చూసినా మోడీ, అమిత్ షానే కనిపించారు. పోస్టర్లు, బ్యానర్లు, కటౌట్ల నిండా వీరి ఫొటోలే. మీడియాలో ఇచ్చిన ప్రకటనల్లోనూ వీరి చిత్రాలే. బీహార్ కు చెందిన బీజేపీ నేతల ముఖాలు పెద్దగా కనిపించడం లేదు. అందుకే, బీహారీ, బాహరీ అన్న నితీష్ కుమార్ నినాదం ప్రభావం చూపింది. ఇది బీహారీలకు, బయటి వారికీ మధ్య పోటీ అన్నది నితీష్ వ్యూహాత్మక నినాదం. బీజేపీ అనాలోచిత వ్యూహాల వల్లే అదే నిజమని రాష్ట్ర ప్రజలు పూర్తిగా నమ్మారు.

ఢిల్లీలో క్లీన్ ఇమేజి ఉన్న అరవింద్ కేజ్రీవాల్ పై విపరీతమైన విమర్శలు చేయడం వికటించింది. ఆమ్ ఆద్మీ పార్టీపై మిగిమీరి నెగెటివ్ ప్రచారం చేయడం ఒక దశలో కొందరు బీజేపీ నేతలకే ఏవగింపు కలించింది. సీఎం అభ్యర్థిగా ఆగమేఘాల మీద కిరణ్ బేడీని దిగుమతి చేయడం ప్లస్ పాయింట్ కాలేదు. బీజేపీ ప్రచార ఆర్భాటం, అట్టహాసం, మోడీ 10 లక్షల సూట్ వివాదం కూడా ఢిల్లీలో ప్రభావం చూపాయి. బీజేపీ ఘోరంగా ఓడిపోయింది. ఈ ఓటమి నుంచి బీజేపీ గుణపాఠం నేర్వలేదు.

బీహార్లోనూ నితీష్ కుమార్ అనే క్లీన్ ఇమేజి గల ముఖ్యమంత్రి ఉన్నారు. ఆయన్ని ఢీకొనేటప్పుడు సంయమనం పాటించాలి. వ్యూహాత్మకంగా వ్యవహరించాలి. నితీష్ ను టార్గెట్ చేయకుండా, అవినీతి కేసులో జైలు శిక్ష పడిన లాలు జంగల్ రాజ్ అంశాన్ని టార్గెట్ చేసి ఉంటే మరోలా ఉండేది. తాము గెలిస్తే ఏం చేస్తామనేది చెప్తూ, నెగెటివ్ ప్రచారం జోలికి వెళ్లకపోతే హుందాగా ఉండేది. కానీ నితీష్ పై మితిమీర విమర్శలు చేశారు. ఇదీ వికటించింది. యూపీలో దాద్రీ ఘటన, బీఫ్ వివాదంలో బీజేపీతో పాటు సంఘ్ పరివార్ నేతలు తీవ్రమైన కామెంట్లు చేయడం బీజేపీ కొంప ముంచింది. వారిని కంట్రోల్ చేయలేని మోడీ, అమిత్ షాలు నిస్సహాయంగా ఉండిపోయారు.

సీఎం అభ్యర్థిని ప్రకటించకపోవడం అతిపెద్ద తప్పిదం. నితీష్ సుపరిపాలన అందించిన సీఎం అని పేరుంది. ఆయనకు పోటీ ఎవరనేది తెలుసుకుని, ఇద్దరినీ బేరీజు వేసుకుని చూసే అవకాశం ప్రజలకు లేకుండా పోయింది. నితీష్ లాగే క్లీన్ ఇమేజి ఉన్న మాజీ ఉప ముఖ్యమంత్రి సుశీల్ కుమార్ మోడీని సీఎం అభ్యర్థిగా ప్రకటిస్తారని భావించారు. అదీ జరగలేదు. ఎన్నికల తర్వాతే ప్రకటిద్దామని బీజేపీ భావించింది. ముందే ఆయన్ని ప్రకటిస్తే అగ్రవర్ణాల వారు, యాదవులు దూరమవుతారని కమలనాథులు ఈ ఎత్తు వేశారు. చిత్తయ్యారు ప్రచార పర్వంలో సుశీల్ మోడీ ఫొటోలను కూడా విస్తృతంగా వాడలేదు. మిగతా నేతలకు కోపం వస్తుందని బీజేపీ భయపడింది. చివరకు బీహారీలు బీజేపీ ప్రచారం వైపు చూస్తే బయటి వారు… అంటే మోడీ, అమిత్ షానే కనిపించే వారు. అందుకే, నితీష్, లాలునే బెటర్ అనుకున్నారు. కాబట్టే లాలు ఆటవిక రాజ్యం అనే అంశాన్ని కూడా పక్కనబెట్టారు.

నితీష్ కుమార్ వదిలించుకున్న జీతన్ రాం మాంజీని కూటమిలో చేర్చుకుని, స్థాయికి మించి సీట్లను కేటాయించింది బీజేపీ. ఎన్డీయేలోని మిగతా మూడు పార్టీలకూ ప్రజల్లో పెద్దగా పట్టులేదు. అయినా వాటికి 80 సీట్లకు పైగా బీజేపీ వదిలిపెట్టడం కూడా దెబ్బతీసింది. రాష్ట్రాన్ని బట్టి రణనీతి మారాలి. సందర్భాన్ని బట్టి వ్యూహరచన చేయాలి. ఎంతసేపూ మోడీని చూసే ఓటేస్తారని గుడ్డిగా భ్రమపడితే ఇలాగే ఉంటుంది.