అల్లు అర్జున్ న‌టిస్తున్న 20వ సినిమా `పుష్ష‌`. అది సెట్స్‌పై ఉండ‌గానే 21వ సినిమాకి సంబంధించిన అధికారిక ప్ర‌క‌ట‌న వ‌చ్చేసింది. ఈ చిత్రానికి కొర‌టాల శివ ద‌ర్శ‌క‌త్వం వ‌హిస్తారు. సుధాక‌ర్ మిక్కిలినేని నిర్మాత‌. ఈ సినిమా కి సంబంధించిన అఫీషియ‌ల్ ఎనౌన్స్‌మెంట్ పోస్ట‌ర్ ఈ రోజు బ‌య‌ట‌కు వ‌చ్చింది. పోస్ట‌ర్‌లో ఓ వైపు ఎలాంటి సౌక‌ర్యాలు లేని ప‌ల్లెటూరి, అటువైపు అధునాతన హంగుల‌తో ఉన్న ప‌ట్నం క‌నిపిస్తున్నాయి. మ‌ధ్య‌లో ఓ న‌ది. ఇవ‌న్నీ చూస్తుంటే… ప‌ల్లెకీ ప‌ట్నానికీ మ‌ధ్య అంత‌రాన్ని చెప్పే సినిమా ఏమో అనిపిస్తోంది. కొర‌టాల శివ క‌థ‌ల‌న్నీ ఏదో ఓ సామాజిక అంశాన్ని సృశిస్తుంటాయి. ఈసారి..ప‌ల్లె – ప‌ట్నం అనే కాన్సెప్టుని ఎంచుకున్నాడ‌నిపిస్తోంది. ఈ సినిమాలో బ‌న్నీని విద్యార్థి నాయ‌కుడిగా చూపించ‌నున్నార‌ని ముందు నుంచీ ప్ర‌చారం జ‌రుగుతోంది. మ‌రి ఇవ‌న్నీ ఊహాగానాలేనా? అస‌లు క‌థేమిటి? అనేది తెలియాలంటే మాత్రం ఇంకొన్ని రోజులు ఆగాలి. ఇటు పుష్ష‌, అటు ఆచార్య రెండూ పూర్త‌య్యాకే.. ఈప్రాజెక్టు మొద‌ల‌వుతుంది. బ‌హుశా 2021 చివ‌ర్లో గానీ… ఈసినిమా ప‌ట్టాలెక్క‌దేమో?