గ్లామర్ పాత్రలతో ప్రేక్షకులని ఫిదా చేసే హీరోయిన్స్ యాక్షన్ బరిలో దిగుతున్నారు. హీరోలకు ధీటుగా పోరాటాలు చేస్తూ యాక్షన్ చిత్రాలతో సై అంటున్నారు. ఒకరు తుపాకీ పట్టుకొని బుల్లెట్ల వర్షం కురిపిస్తే.. మరొకరు కత్తిపట్టుకొని కదనరంగంలోకి దిగుతున్నారు. ఒక్కసారి ఆ వివరాల్లోకి వెళితే..

సమంత నుంచి కొత్త సినిమా ప్రకటన వచ్చింది. బంగారం టైటిల్ తో రూపొందే ఈ సినిమా యాక్షన్ ఆధారంగా వుంటుంది. ఫస్ట్ లుక్ లో గన్ పట్టుకొని కనిపించింది సమంత. ఇదివరకూ ఫ్యామిలీ మ్యాన్ సిరిస్ లో యాక్షన్ చేసింది సమంత. ఆ పాత్ర కోసం ప్రత్యేకంగా సిద్ధమైయింది. అందులో సమంత యాక్షన్ చూసి ఆడియన్స్ .. మంచి యాక్షన్ కథపడితే బావుంటుందని అనుకున్నారు. బంగారం అలాంటి యాక్షన్ కథే. దీంతో పాటు సిటాడెల్ వెబ్ సిరిస్ చేస్తోంది సమంత. ఇది స్పై థ్రిల్లర్. ఇందులో కూడా చాలా యాక్షన్ ఎపిసోడ్స్ వున్నాయి.

అనుష్క చాలా రోజుల తర్వాత మళ్ళీ యాక్షన్ లోకి దిగింది. క్రిష్ తో చేస్తున్న సినిమా యాక్షన్ జోనర్ లో ఉండబోతుంది. అనుష్క కెరీర్ మొదలుపెట్టిందే యాక్షన్ సినిమాతో. సూపర్ సినిమాలో టామ్ బాయ్ గా కనిపించిన స్వీటీ తర్వాత గ్లామరస్ పాత్రలతో అదరగొట్టింది. ఆ తర్వాత అరుంధతిగా కత్తి పట్టి చరిత్ర సృష్టించింది. ఇటివలే మిస్ శెట్టితో మళ్ళీ రీఎంట్రీ ఇచ్చిన అనుష్క. ఇప్పుడు మరోసారి యాక్షన్ తో ప్రేక్షకులు ఫిదా చేయబోతోంది.

చందమామ కాజల్ సెకండ్ ఇన్నింగ్స్ లో సత్యభామగా అలరించబోతోంది. ఈ సినిమా కోసం ఖాకీ ధరించిన కాజల్ యాక్షన్ సన్నివేశాలతో అదరగొట్టడాని సిద్ధమౌతోంది. కెరీర్ లో చాలా వరకూ గ్లామరస్ పాత్రలే చేసింది కాజల్. ఇప్పుడు యూనిఫాం రోల్ చేయడంతో సహజంగానే సత్యభామపై ఆసక్తి ఏర్పడింది.

తమన్నా ప్రస్తుతం ఓదెల 2 సినిమాతో బిజీగా వుంది. ఫాంటసీ టచ్ తో తెరకెక్కుతున్న ఈ చిత్రంలో యాక్షన్ సన్నివేశాలు వున్నాయి. ఇందులో నాగసాధు పాత్రలో కనిపించనుంది తమన్నా. కథ ప్రకారం గ్రాఫిక్స్ తో ముడిపడిన కొన్ని యాక్షన్ సీన్స్ ఇందులో ప్రత్యేక ఆకర్షణగా నిలుస్తాయని సమాచారం.

సానికాయుదం చిత్రంతో ఇప్పటికే ఓ యాక్షన్ రోల్ చేసింది కీర్తి సురేష్. పూర్తిగా రా, రస్టిక్ పాత్రలో కీర్తిని చూడటం ఫ్యాన్స్ కి కొత్త ఫీలింగ్ ఇచ్చింది. ఇప్పుడు రివాల్వర్ రీటా సినిమా చేస్తోంది. యాక్షన్ టచ్ వున్న హ్యుమర్ సినిమా ఇది. కీర్తి క్యారెక్టరే ప్రధాన ఆకర్షణగా సినిమాని రూపొందించారు.

అడివిశేష్ తో శ్రుతి హాసన్ చేస్తున్న ‘డకాయిట్’ యాక్షన్ సినిమా. ఇందులో అడివి శేష్ కి ధీటుగా యాక్షన్ చేయబోతోంది శ్రుతి. యాక్షన్ సీక్వెన్స్ లు ఇద్దరికీ సమానంగా ఉంటాయని తెలుస్తోంది. ఇప్పటికే ఒక యాక్షన్ ప్యాక్డ్ టీజర్ వదిలారు. ఇందులో హీరోపైనే గన్ గురిపెడుతూ కనిపించింది శ్రుతి.

వార్ బ్యాక్ డ్రాప్ లో రూపొందుతోంది నిఖిల్ స్వయంభూ. సంయుక్త మీనన్, నభా నటేష్ హీరోయిన్స్. ఇందులో కధనం రంగంలోకి దూకి యుద్ధం చేసే కొన్ని సన్నివేశాలు హీరోయిన్స్ కీ వున్నాయట. దీని కోసం సంయుక్త, నభా నటేష్ ప్రత్యేకంగా శిక్షణ కూడా తీసుకున్నారు. హీరోయిన్ చాందిని చౌదరి పోలీస్ పాత్రలో ఓ సినిమా చేస్తోంది. ఇందులో కూడా యాక్షన్ సన్నివేశాలు ప్రత్యేక ఆకర్షణగా ఉండబోతున్నాయి.