నటుడిగా గోపీచంద్‌కి ‘పంతం’ 25వ సినిమా. జూలై 5న విడుదలవుతోంది. ఇటీవల గోపీచంద్ చేసిన ప్రతి సినిమా పల్టీ కొట్టేయడంతో తనకు కలిసి వచ్చిన రెగ్యులర్ మాస్ కమర్షియల్ ఫార్మటులో చేసిన ‘పంతం’పై గంపెడు ఆశలు పెట్టుకున్నాడు. దీని తర్వాతి సినిమాపై హీరో నుంచి ఎటువంటి ప్రకటన రాలేదు కానీ… కథతో పాటు దర్శకుణ్ణి లాక్ చేసి పెట్టుకున్నాడని విశ్వసనీయ వర్గాల సమాచారం. ‘గౌతమ్ నంద’లో తనని చాలా స్టైలిష్‌గా చూపించిన సంపత్ నంది దర్శకత్వంలో 26వ సినిమా చేయాలని గోపీచంద్‌ ఓ నిర్ణయం తీసుకున్నార్ట‌. గోపీచంద్ 25వ సినిమా నిర్మించిన కె.కె. రాధామోహనే తాజా సినిమానూ నిర్మిస్తారని టాక్. సంపత్ నంది దర్శకత్వంలో రవితేజ హీరోగా ‘బెంగాల్ టైగర్’ సినిమాను నిర్మించింది ఆయనే. అటు హీరోతోనూ, ఇటు దర్శకుడితోనూ ఆయనకు ఇది రెండో సినిమా అవుతుంది. ‘పంతం’ విడుదల తరవాత కొత్త సినిమాను ప్రకటిస్తారని తెలుస్తోంది. ‘గౌతమ్ నంద’ తరవాత సంపత్ నంది మరో సినిమా డైరెక్ట్ చేయలేదు. నిర్మాతగా ‘పేపర్ బాయ్’ సినిమా చేశారు. అది త్వరలో విడుదల కానుంది.