తెలంగాణ అసెంబ్లీలో కేటీఆర్, అక్బరుద్దీన్ మధ్య వాగ్వాదం జరిగింది. కేసీఆర్ అసెంబ్లీకి రావడం లేదని.. అక్బరుద్దీన్ అనడంతో కేటీఆర్‌కు కోపం వచ్చింది. సభా నాయకుడితో అక్బరుద్దీన్‌కు ఏం పని అని ప్రశ్నించారు. కేవలం ఏడుగురు ఎమ్మెల్యేలు ఉన్న మజ్లిస్ కు మాట్లాడేందుకు అంత సమయం ఇవ్వడం ఏమిటని ప్రశ్నించారు. దీంతో అక్బరుద్దీన్ కూడా ఫీలయ్యారు. తమను ఏడుగురు ఎమ్మెల్యేలు అంటున్నారని.. దీన్ని చాలెంజ్ గా తీసుకుంటామని వచ్చే ఎన్నికల్లో యాభై స్థానాల్లో పోటీ చేస్తామని ప్రకటించారు. దీంతో ఉలిక్కి పడటం బీఆర్ఎస్ నేతల వంతయింది.
గత ఎన్నికల్లో కేసీఆర్ కు మజ్లిస్ పరోక్ష సహకారం ఎంతో లబించింది. ఎనిమిది చోట్ల తప్ప మజ్లిస్ ఇతర చోట్ల పోటీ చేయలేదు. అన్ని చోట్లా బీఆర్ఎస్‌కు మద్దతు ఇవ్వాలని పరోక్షంగా తమ వర్గానికి సంకేతాలు పంపింది. దీంతో ముస్లిం వర్లం ఎక్కువ ఉన్న చోట్ల బీఆర్ఎస్ విజయం సులువు అయింది. అయితే ఇటీవలి కాలంలో తమ పార్టీని విస్తరించాలనుకుంటున్న మజ్లిస్… మరికొన్ని స్థానాల్లో పోటీ చేసేందుకు సిద్ధయింది. రాజేంద్రనగర్, జూబ్లీహిల్స్,బోధన్, నిజామాబాద్ లాంటి చోట్ల అభ్యర్థుల్ని నిలబెట్టాలని నిర్ణయించుకుంది. అయితే ఇప్పుడు కేటీఆర్ వ్యాఖ్యలతో ఆ సంఖ్య యాభైకి చేరుకుంది.
కానీ బీఆర్ఎస్, మజ్లిస్ పార్టీల నిర్ణయాలు కేటీఆర్, అక్బర్ చేతుల్లో ఉండవు. కేసీఆర్, అసదుద్దీన్ చర్చించుకుని రాజకీయ వ్యూహాలు ఖరారు చేస్తారు. అసదుద్దీన్ తానుత్యాగం చేయడానికి ఎప్పుడూ ముందుకురారు. తన అవసరం ఉందని ఇతర పార్టీలు అనుకుంటే… గరిష్టంగా ప్రయోజనం పొందే ప్రయత్నం చేస్తారు. అందుకే.. ఇప్పుడు అక్బర్ ప్రకటనతో ముందు ముందు బీఆర్ఎస్‌కు క్లిష్ట పరిస్థితులు ఏర్పడవచ్చని చెబుతున్నారు.
