ఒక‌ప్పుడైతే తెలుగు చిత్ర‌సీమ‌లో క‌థానాయిక‌ల కొర‌త బాగానే క‌నిపించేది. ఇప్పుడు ఆ లోటు కాస్త తీరింది. కొత్త‌మ్మాయిలు త‌ఢాకా చూపించ‌డం, నిల‌దొక్కుకోవ‌డం, బ‌డా హీరోయిన్లు ఫామ్ కొన‌సాగించ‌డంతో కొంత కాలంగా క‌థానాయిక‌ల స‌మ‌స్య పెద్ద‌గా త‌లెత్త‌లేదు. అయితే.. ఈ సీజ‌న్‌లో మాత్రం హీరోయిన్ల‌తో కాస్త పేచీ వ‌స్తోంది. సీనియ‌ర్లు, జూనియ‌ర్లు ఎవ‌రి సినిమాల‌తో వాళ్లు బిజీగా ఉండ‌డంతో కాల్షీట్ల స‌మ‌స్య త‌లెత్తుతోంది. దీనికి తోడు ‘కొత్త కాంబినేష‌న్లు’ చూపించాల‌ని ద‌ర్శ‌కులు త‌హ‌త‌హ‌లాడుతుండ‌డంతో న‌యా భామ‌ల వేట మ‌రోసారి మొద‌లైంది. అఖిల్ రెండో సినిమాలో క‌థానాయిక ఎవ‌ర‌న్న‌ది ఇంత వ‌ర‌కూ తేల‌లేదు. అఖిల్ ప‌క్క‌న కొత్త‌మ్మాయే క‌నిపిస్తుంద‌ని నాగ్ ఎప్పుడో చెప్పేశాడు. కొంత‌మంది అమ్మాయిల్ని అడిష‌న్స్ కూడా చేసేశారు. కానీ.. ఫైనల్ రిజల్ట్ ఏంట‌న్న‌ది తేల‌లేదు.
మ‌రోవైపు అల్లు అర్జున్ కోస‌మూ క‌థానాయిక వేట మొద‌లైంది. అల్లు అర్జున్ ప్ర‌స్తుతం డీజే సినిమాతో బిజీగా ఉన్నాడు. ఆ వెంట‌నే… వ‌క్కంతం వంశీ సినిమాని సెట్స్‌పైకి తీసుకెళ్తారు. ఈనెల 21న ఈ సినిమా షూటింగ్ లాంఛ‌నంగా ప్రారంభం కానున్న‌ద‌ని తెలుస్తోంది. ఈ లోగా క‌థానాయిక‌ని ఎంచుకొనే ప‌నిలో ప‌డింది చిత్ర‌బృందం. ఈసారి బ‌న్నీ ప‌క్క‌న కొత్త‌మ్మాయే క‌నిపించ‌నుంద‌ని తెలుస్తోంది. ఇటీవ‌ల గీతా ఆర్ట్స్‌లో.. కొంత‌మంది అమ్మాయిల్ని అడిష‌న్స్ చేశార్ట. వాళ్ల‌లో ఒక‌ర్ని ఎంపిక చేయ‌డం ఖాయ‌మ‌ని స‌మాచారం. సో… ఈ రెండు క్రేజీ సినిమాల్లోనూ కొత్త‌మ్మాయిలే క‌నిపిస్తారన్న‌మాట.
