గీతా ఆర్ట్స్‌లో అఖిల్ ఓ సినిమా చేయ‌బోతున్నాడ‌ని జోరుగా ప్ర‌చారం సాగుతోంది. అఖిల్ కోసం ప‌ర‌శురామ్ ఓ క‌థ సిద్ధం చేస్తున్నార‌ని చెప్పుకుంటున్నారు. `గీత గోవిందం`తో సూప‌ర్ ఫామ్‌లోకి వ‌చ్చేశాడు ప‌ర‌శురామ్‌. త‌నైతే అఖిల్ కెరీర్‌ని ఓ గాడిన పెట్టొచ్చ‌నిపిస్తోంది. కాక‌పోతే… అఖిల్ కోసం క‌థ సిద్ధం చేస్తోంది ప‌ర‌శురామ్ కాద‌ని, బొమ్మ‌రిల్లు భాస్క‌ర్ అని తేలింది. భాస్క‌ర్ ఎప్ప‌టి నుంచో గీతా ఆర్ట్స్ చుట్టూనే తిరుగుతున్నాడు. నాలుగైదు క‌థ‌లు సిద్ధం చేసుకున్న భాస్క‌ర్‌కి హీరో దొర‌క‌డం లేదు. అయినా ప‌ట్టు వ‌ద‌ల‌ని విక్ర‌మార్కుడిలా ప్ర‌య‌త్నాలు సాగిస్తున్నాడు. ఎట్ట‌కేల‌కు అఖిల్‌ని సెట్ చేశార‌ని స‌మాచారం. `బొమ్మ‌రిల్లు` త‌ర‌వాత ఆ స్థాయి విజ‌యాన్ని చ‌విచూడ‌లేక‌పోయాడు భాస్క‌ర్‌. ప‌రుగు ఓకే అనిపిస్తే ఆరెంజ్ ఫ్లాప్ లిస్టులో చేరింది. ఒంగోలు గిత్త డిజాస్ట‌ర్ అనిపించుకుంది. అప్ప‌టి నుంచీ భాస్క‌ర్ మీడియా ముందుకు కూడా రాలేదు. అలాంటి భాస్క‌ర్‌కి వెన్నెద‌న్నుగా నిలిచింది గీతా ఆర్ట్స్‌. మ‌రి వ‌రుస ఫ్లాపుల్లో ఉన్న భాస్క‌ర్‌.. త‌న‌లానే ప‌రాజ‌యాల‌తో కొట్టుమిట్టాడుతున్న అఖిల్‌కి ఓ హిట్టు ఇవ్వ‌గ‌ల‌డా?? అన్న‌దే మిలియ‌న్ డాల‌ర్ల ప్ర‌శ్న‌.