‘గూఢచారి’… థ్రిల్లింగ్ హిట్ ‘క్షణం’ తరవాత అడవి శేష్ సోలో హీరోగా నటిస్తున్న సినిమా. మొన్నటివరకూ ఈ సినిమాపై పెద్దగా బజ్ లేదు. వున్నట్టుండి ట్రైలర్ రిలీజ్‌తో క్రేజ్ వచ్చింది. ట్రైలర్ రిలీజ‌య్యింద‌ని ప్రేక్షకులకు తెలియడానికి ఓ కారణం సమంత. ఆమె కార్యక్రమానికి రావడానికి కారణం నాగార్జున మేనకోడలు సుప్రియ. ఆవిడ సినిమాలో ఇంపార్టెంట్ క్యారెక్టర్ చేశారు. సుప్రియ కోసం సమంత కార్యక్రమానికి రావలసి వచ్చింది. సమంత కోసం ప్రోగ్రామ్‌ను రామానాయుడు స్టూడియో నుంచి అన్న‌పూర్ణ స్టూడియోకి మార్చారు.

శుక్రవారం సాయంత్రం అఖిల్ అక్కినేని ‘గూఢచారి’ టీజర్ గురించి ట్వీట్ చేశారు. ‘ఆల్ ద బెస్ట్ టు మై డియరెస్ట్ సిస్టర్ అండ్ టీమ్’ అని పేర్కొన్నారు. అతను ట్వీట్ చేయడానికీ కారణం సుప్రియే. ఈ సినిమా మున్ముందు పబ్లిసిటీ కార్యక్రమాలకు అక్కినేని ఫ్యామిలీ మెంబర్స్ వస్తారని సమాచారం. సుప్రియ కోసం సినిమాను వీలైనంత బాగా ప్రమోట్ చేయాలని నిర్ణయించుకున్నార్ట‌. ఒక రకంగా సుప్రియకు ఇది రీ ఎంట్రీ అనుకోవాలి.

పవన్ కల్యాణ్ ‘అక్కడ అమ్మాయి ఇక్కడ అబ్బాయి’లో సుప్రియ హీరోయిన్‌గా నటించారు. తర్వాత నటనకు గుడ్ బై చెప్పేశారు. అన్నపూర్ణ స్టూడియోల నిర్వహణ, అక్కినేని నాగార్జున నిర్మించే సినిమాల బాధ్యతలు చూసుకున్నారు. ‘గూఢచారి’తో మళ్ళీ ముఖానికి మేకప్ వేసుకున్నారు. నటిగా ఎక్కువ సినిమాలు చేస్తారో లేదో చూడాలి.