బ‌యోపిక్‌ల జోరు కొన‌సాగుతోంది. సావిత్రి క‌థ సూప‌ర్ హిట్ట‌వ్వ‌డం, ఎన్టీఆర్ జీవిత క‌థ ప‌ట్టాలెక్క‌బోతుండ‌డంతో.. బ‌యోపిక్‌ల ప‌రంప‌ర‌కు టాలీవుడ్‌లో జీవం వ‌చ్చిన‌ట్టైంది. ఇప్పుడు నాగార్జున‌కు ఏఎన్నార్ బ‌యోపిక్ తీస్తే ఎలా ఉంటుంద‌న్న ఆలోచ‌న వ‌చ్చిన‌ట్టు సమాచారం. సావిత్రి క‌థ‌లోలానే.. అక్కినేని క‌థ‌లోనూ పెయిన్ ఉంది. ఎత్తు ప‌ల్లాలున్నాయి. ఎవ‌రెస్టుని తాకిన విజ‌యాలున్నాయి. ఆయ‌న మ‌ర‌ణం కూడా.. ఓ అద్భుత‌మైన క‌థే. `నాకు కాన్స‌ర్ వ‌చ్చింది. ఎంతోకాలం బ‌త‌క‌ను` అని ప్రెస్ మీట్ పెట్టి, అభిమానుల్ని ముందే సిద్ధం చేశారాయ‌న. మంచం మీద ఉండ‌గానే.. త‌న పాత్ర‌కు తానే డ‌బ్బింగ్ చెప్పుకున్నారు. చివ‌రి క్ష‌ణం వ‌ర‌కూ న‌టిస్తూనే ఉన్నారు. ఏఎన్నార్ బ‌యోపిక్ తీస్తే… నాగార్జునే తీయాలి కూడా. అందుకే.. `నాన్న‌గారి బ‌యోపిక్ తీస్తే ఎలా ఉంటుంది` అనే ఆలోచ‌న‌ల‌తో నాగ్ త‌ర్జ‌న భ‌ర్జ‌న‌లు పడుతున్నాడ‌ని తెలుస్తోంది. ఇందుకు సంబంధించి కొంత‌మంది ర‌చ‌యిత‌లతోనూ నాగ్ సంప్ర‌దింపులు జ‌రుపుతున్నాడ‌ట. మ‌రి ఇందుకు సంబంధించిన అధికారిక ప్ర‌క‌టన ఏమైనా వ‌స్తుందేమో చూడాలి.
అక్కినేని బ‌యోపిక్ వ‌స్తోందా?
