ఈవీవీ స‌త్య‌నారాయ‌ణ చిత్రాల్లో ఆ ఒక్క‌టీ అడ‌క్కు సినిమాకి ప్ర‌త్యేక‌మైన స్థానం ఉంది. రాజేంద్ర ప్ర‌సాద్ న‌ట‌న‌, రంభ అందాలు, రావు గోపాల‌రావు డైలాగులు, కామెడీ.. ఇవ‌న్నీ క‌లిసి ఆ సినిమాని సూప‌ర్ డూప‌ర్ హిట్ చేశాయి. ఈ చిత్రానికి సీక్వెల్ వ‌స్తే ఎలా ఉంటుంది?? ప్ర‌స్తుతం అల్ల‌రి న‌రేష్ ఆ ఆలోచ‌న‌ల్లోనే ఉన్న‌ట్టు తెలుస్తోంది. ఆ ఒక్క‌టి అడ‌క్కు సినిమాకి సీక్వెల్‌గా ఆ ఒక్క‌టీ అడుగుతా.. అనే పేరుతో ఓ సినిమా తీస్తే బాగుంటుంద‌న్న‌ది ఆయ‌న ఆలోచ‌న‌. ”మా డాడీ ఓసారి ‘ఆ ఒక్క‌టీ అడ‌క్కు’కి సీక్వెల్ చేద్దామ‌ని నాతో అన్నారు. రాజేంద్ర‌ప్ర‌సాద్‌, రంభ‌ల‌కు ఓ కొడుకు పుడితే… వాడికీ జాత‌కాల పిచ్చి ఉంటే ఎలా ఉంటుంది? అనే ఆలోచ‌న వ‌చ్చింది. అప్ప‌ట్లోనే ఈసినిమా తీద్దామ‌నుకొన్నాం. కానీ కుద‌ర్లేదు. నాన్న తీసిన సినిమాల్లో ఏదైనా సీక్వెల్ చేయాల‌నుకొంటే… ఈ సినిమానే చేస్తా” అంటున్నాడు న‌రేష్‌. ఆయ‌న న‌టించిన సెల్పీ రాజా ఈ శుక్ర‌వారం ప్రేక్ష‌కుల ముందుకు వ‌స్తోంది. వ‌రుస ప‌రాజ‌యాల‌తో ఇబ్బందుల్లో ఉన్న న‌రేష్‌కి ఈ సినిమాతో హిట్టు కొట్ట‌డం అవ‌స‌రం. మ‌రి ఏం జ‌రుగుతుందో చూడాలి.