ఆగ‌స్టు 15న రావాల్సిన ‘పుష్ష 2’ డిసెంబ‌రు నాటికి వాయిదా ప‌డింది. ఇంకా స‌మ‌యం ఉంది కదా, అని సుకుమార్ కూడా ఈ సినిమాని చాలా నిదానంగానే తెర‌కెక్కిస్తున్నాడు. డిసెంబ‌రులో పుష్ష వ‌చ్చేస్తుంది. మ‌రి ఆ త‌ర‌వాత బ‌న్నీ చేసే సినిమా ఏమిటి, ఎవ‌రితో? ఈ ప్ర‌శ్న‌లు బ‌న్నీ ఫ్యాన్స్ ని ఉక్కిరి బిక్కిరి చేస్తున్నాయి.

అల్లు అర్జున్ తో చేయ‌డానికి చాలా మంది ద‌ర్శ‌కులు రెడీగా ఉన్నారు. కానీ బ‌న్నీ నుంచి ఎలాంటి క్లారిటీ లేదు. బోయ‌పాటి శ్రీ‌ను తో అల్లు అర్జున్ ఓ సినిమా చేయాల్సివుంది. అయితే ‘అఖండ‌ 2’ త‌ర‌వాత బోయ‌పాటి ఫ్రీ అవుతారు. కాబ‌ట్టి బోయ‌పాటి ఆప్ష‌న్‌ని పక్క‌న పెట్టాల్సిందే. త్రివిక్ర‌మ్ కూడా బ‌న్నీ కోసం ఓ క‌థ రెడీ చేశారు. కానీ ఈ ప్రాజెక్టుపై ఇప్ప‌టి వ‌ర‌కూ స్ప‌ష్ట‌త లేదు. త్రివిక్ర‌మ్ ఈ గ్యాప్ లో వేరే సినిమా చేస్తార‌ని, ఆ త‌ర‌వాతే బ‌న్నీ ద‌గ్గ‌ర‌కు వ‌స్తార‌ని ప్ర‌చారం జ‌రుగుతోంది. ఇప్పుడు మ‌రో దర్శ‌కుడి పేరు రేస్‌లోకి వ‌చ్చింది. త‌నే నెల్స‌న్‌. ర‌జ‌నీకాంత్ తో ‘జైల‌ర్’ రూపొందించిన ద‌ర్శ‌కుడీయ‌న‌. ర‌జ‌నీని చూపించిన విధానం ఆయ‌న ఫ్యాన్స్ కు భ‌లే న‌చ్చింది. ర‌జ‌నీ వ‌య‌సుకి త‌గిన క‌థ‌తో నెల్స‌న్ ప్రేక్ష‌కుల్ని మెస్మ‌రైజ్ చేశాడు. ఇప్పుడు బ‌న్నీ కోసం ఓ క‌థ రెడీ చేసిన‌ట్టు తెలుస్తోంది. ‘పుష్ష 2’ త‌ర‌వాత సుకుమార్ వెంట‌నే ‘పుష్ష 3’ మొద‌లెడితే.. బ‌న్నీ ఇన్ని ఆప్ష‌న్ల‌ని ప‌క్క‌న పెట్టుకోవాల్సిన ప‌ని లేదు. ‘పుష్ష 2’, ‘పుష్ష 3’ మ‌ధ్య గ్యాప్ ఉండాల‌ని, లేదంటే మొనాటినీ వ‌చ్చేస్తుంద‌ని బ‌న్నీ భావిస్తున్నాడు. కాబ‌ట్టి మ‌రో సినిమా చేశాకే పుష్ష 3 ద‌గ్గ‌ర‌కు వెళ్తారు. ఆ మ‌రో సినిమాకు ద‌ర్శ‌కుడెవ‌న్న‌దే స‌స్పెన్స్‌. ఈ జాబితాలో నెల్స‌న్‌కే అవ‌కాశాలు ఎక్కువ‌గా క‌నిపిస్తున్నాయి. అయితే నెల్స‌న్ కూడా ‘జైల‌ర్ 2’ క‌థ‌ని సిద్ధం చేస్తున్నాడు. బ‌న్నీ కోసం అది ప‌క్క‌న పెట్ట‌గ‌లిగితే బ‌న్నీతో సినిమాకు అడ్డు తొల‌గిన‌ట్టే.