నానికి అచ్చొచ్చిన తేదీ సెప్టెంబ‌రు 5. స‌రిగ్గా ప‌న్నెండేళ్ల క్రితం హీరోగా త‌న తొలి సినిమా అష్టాచ‌మ్మా… ఈరోజే విడుద‌లైంది. త‌న 25వ సినిమా `వి` కూడా ఇదే రోజున విడుద‌ల చేద్దామ‌న్న‌ది ప్లాన్‌. అమేజాన్ కూడా దానికి ఓకే చెప్పి `వి`ని సెప్టెంబ‌రు 5న విడుద‌ల చేయ‌డానికి సై అంది. దాంతో నాని టీమ్ హ్యాపీ గా ఫీల‌య్యింది. త‌మ‌కు అచ్చొచ్చిన తేదీనే 25వ సినిమా రావ‌డంతో.. సంతోషం వ్య‌క్తం చేసింది. అమేజాన్ లెక్క‌ల ప్ర‌కారం.. ఈ సినిమాని స‌రిగ్గా అర్థ‌రాత్రి 12 గంట‌ల 5 నిమిషాల‌కు స్ట్రీమ్ చేయాలి.

కానీ అమేజాన్ షాక్ ఇచ్చింది. రాత్రి ప‌ది గంట‌ల‌కే ఈ సినిమాని స్ట్రీమింగ్ కి ఉంచింది. నిజానికి ఈ సినిమా 10 గంట‌ల‌కే విడుద‌ల చేస్తున్నార‌న్న విష‌యం `వి` టీమ్‌కి అస్స‌లు తెలీదు. దాంతో పాటు… నాని సెంటిమెంట్ లెక్క కూడా మారిపోయింది. `వి` సెప్టెంబ‌రు 5న కాకుండా 4నే విడుద‌లైపోయింది. ప‌ది గంట‌ల‌కు ఈ సినిమాని స్ట్రీమింగ్‌కి ఉంచుతున్న‌ర‌న్న విష‌యం దిల్ రాజు పీఆర్ టీమ్ కి సైతం తెలియ‌లేదు. 12 గంట‌ల‌కు క‌దా.. అని చాలామంది 12 వ‌ర‌కూ ఎదురు చూసి, అమేజాన్ మీట నొక్కాల్సివ‌చ్చింది. మొత్తానికి అమేజాన్ తొంద‌ర‌ప‌డ‌డం వ‌ల్ల – నాని సెంటిమెంట్ డేట్ ని మిస్ అవ్వాల్సివ‌చ్చింది.