ఎఫ్ 2 సూప‌ర్ డూప‌ర్ హిట్ట‌య్యింది. ఆ ఉత్సాహంలో ఎఫ్ 3 తీస్తాన‌ని ప్ర‌క‌టించేసింది చిత్ర‌బృందం. మ‌ధ్య‌లో `స‌రిలేరు నీకెవ్వ‌రు` పూర్తి చేసి, ఇప్పుడు ఎఫ్ 3 ప‌నిలో ప‌డ్డాడు అనిల్ రావిపూడి. ఎఫ్ 2లో ఇద్ద‌రు హీరోలుంటే, ఎఫ్ 3లో ముగ్గురు ఉంటార‌ని హింట్ ఇచ్చింది చిత్ర‌బృందం. ఆ హీరో ఎవ‌ర‌న్న ఆస‌క్తి అంద‌రిలోనూ నెల‌కొంది. ముందు ర‌వితేజ అన్నారు, ఆ త‌ర‌వాత మ‌హేష్ బాబు పేరు వినిపించింది. ఆ త‌ర‌వాత ఇద్ద‌రూ చేయ‌ట్టేద‌న్నారు. దాంతో క‌న్‌ఫ్యూజ‌న్ నిన్నటి వ‌ర‌కూ కొన‌సాగింది.

అయితే ఇప్పుడు ఈ సినిమాలో మూడో హీరో లేడ‌ని తేలిపోయింది. ఈ విష‌యాన్ని స్వ‌యంగా ద‌ర్శ‌కుడు అనిల్ రావిపూడినే తెలిపాడు. మూడో హీరో అనుకున్న మాట నిజ‌మే అని, కానీ ప్ర‌స్తుతానికైతే మూడో హీరో లేడ‌ని, చివ‌ర్లో యాడ్ అవుతాడేమో చెప్ప‌లేన‌ని తేల్చేశాడు. ఎఫ్ 2 లో న‌టించిన వెంక‌టేష్‌, వ‌రుణ్ తేజ్‌, త‌మ‌న్నా, మెహ‌రీన్ లే ఈ సినిమాలోనూ క‌నిపిస్తార‌ని, ఎఫ్ 2 అంతా పెళ్లి చుట్టూ తిరిగితే, ఈ సినిమాలో ఆ గోల ఉండ‌ద‌ని, మ‌రో కొత్త స‌మ‌స్య క‌నిపిస్తుంద‌ని చెప్పాడు. గోల్ మాల్ లా ఎఫ్ 2 కూడా ఫ్రాంజేజీ లా న‌డుపుతామ‌ని, ప్ర‌తీసారీ ఓ కొత్త పాయింటుతో వ‌స్తామ‌ని హామీ ఇస్తున్నాడు అనిల్ రావిపూడి.