స్టార్ డ‌మ్ లోనే కాదు, హైట్ లోనూ అమితాబ్ బ‌చ్చ‌న్‌ని కొట్టేవాళ్లే లేరు. బాలీవుడ్ స్టార్స్‌ల‌లో ఆయ‌న అత్యంత పొడ‌గ‌రి. ఆయ‌న ఎత్తు.. ఆర‌డుగుల రెండు అంగుళాల పైమాటే. అయితే… ‘క‌ల్కి’ కోసం ఆయ‌న మ‌రింత ఎత్తు పెరిగారు. నాగ అశ్విన్ ద‌ర్శ‌క‌త్వంలో ప్ర‌భాస్ క‌థానాయ‌కుడిగా రూపొందిన చిత్రం ‘క‌ల్కి’. ఇందులో అశ్వ‌ద్ధామ పాత్ర‌లో అమితాబ్ బ‌చ్చ‌న్ క‌నిపించ‌నున్నారు. ఇటీవ‌ల ఆయ‌న పాత్ర‌కు సంబంధించిన గ్లింప్స్ కూడా విడుద‌లైంది. ఈ సినిమాలో ఆయ‌న రెండు గెట‌ప్పుల‌లో ద‌ర్శ‌న‌మివ్వ‌నున్నారు. ఓ పాత్ర కోసం ఏఐ (ఆర్టిఫిషియ‌ల్ ఇంటిలిజెన్స్‌) స‌హాయం తీసుకొని, ఆయ‌న్ని యంగ్ అమితాబ్ గా మార్చేశారు. అంతేకాదు.. అమితాబ్ హైట్ పెంచి మ‌రీ చూపించే ప్ర‌య‌త్నం చేశార‌ని స‌మాచారం.

పురాణాల్లోని ఆశ్వ‌ద్ధామ పాత్ర‌ని రిఫ‌రెన్స్ గా తీసుకొని ఆ పాత్ర‌ని తీర్చిదిద్దారు. అశ్వ‌ద్ధామ‌ని మిగిలిన పాత్ర‌ల‌కంటే పొడుగ్గా చూపించాల‌న్న‌ది నాగ అశ్విన్ ఆలోచ‌న‌. అయితే ప్ర‌భాస్ హైట్ కూడా ఇంచుమించుగా ఆరు అడుగుల పైమాటే. అందుకే ప్ర‌భాస్ కంటే ఎత్తులో ఆ పాత్ర‌ని చూపించే క్ర‌మంలో అమితాబ్ ఎత్తుని మ‌రికొంత పెంచి, చూపించార‌ని తెలుస్తోంది. అమితాబ్ ఇన్ని వంద‌ల సినిమాలు చేసినా, ఎవ‌రూ ఈ త‌ర‌హా ప్ర‌య‌త్నం చేయ‌లేదు. అశ్వ‌ద్ధామ పాత్ర ఔచిత్సం కోసం, అమితాబ్ పాత్ర‌ని నాగ అశ్విన్ డిజైన్ చేసుకొన్న ప‌ద్ధ‌తి ప్ర‌కారం, ఆ పాత్ర హైట్ పెంచాల్సివ‌చ్చింద‌ని స‌మాచారం. అంతే కాదు.. ఈ సినిమాలో మిగిలిన పాత్ర‌ల విష‌యంలోనూ నాగ అశ్విన్ ఓ థియ‌రీ ఫాలో అయ్యార్ట‌. అవ‌న్నీ తెలియాలంటే.. నాగ అశ్విన్ ఈ సినిమా గురించిన విపుల‌మైన స‌మాచారం ప్రేక్ష‌కుల‌తో పంచుకోవాల్సిందే.