అవసరం లేదని పోలీసుల మోహరింపు.. అంతకు మించి ఆడవాళ్లపై దాడులు.. 144 సెక్షన్లు.. వెంటబడి కొట్టడాలు.. ఇవీ.. అమరావతి గ్రామాల్లోనే కాదు.. గుంటూరు, కృష్ణా జిల్లాలో గత నెల రోజులుగా చోటు చేసుకుంటున్న పరిణామాలు. ఇవన్నీ దేశవ్యాప్తంగా హాట్ టాపిక్ అయ్యాయి. ఇంత దారుణమా.. అంటూ.. హైకోర్టు కూడా స్పందించింది. చట్టాన్ని ఉల్లంఘించిన పోలీసులపై చర్యలు తీసుకోవాలని ఆదేశించింది. దీంతో పోలీసుల్లో ఉలికిపాటు ప్రారంభమయింది. పోలీసుల అత్యంత దారుణంగా విరుచుకుపడుతున్న సమయంలో.. ఎక్కడా కనిపించని.. వినిపించని ఏపీ డీజీపీ… హైకోర్టు సీరియస్ అయిన తర్వాత ఒక్క సారిగా తెరపైకి వచ్చారు. ఓ రాజకీయ నేత సాయంతో.. కొంత మంది రైతుల్ని పిలిపించుకున్నట్లుగా మీడియాకు సమాచారం ఇచ్చారు. వారంతా.. పోలీసులు తమను బాధలు పెట్టారని.. చెప్పుకున్నారట.

అప్పుడు డీజీపీ సవాంగ్.. ఇప్పటి వరకూ జరిగిందేదో జరిగిపోయింది.. ఇక నుంచి పోలీసులు ఎలాంటి ఇబ్బందులు పెట్టకుండా.. ఉంటారని.. హామీ ఇచ్చారట. మీడియాకు.. పోలీసు వర్గాల నుంచి అందిన సమాచారం ఇది. ఓ బీజేపీ స్థానిక నాయకుడి ఆధ్వర్యంలో కొంత మంది రైతులు డీజీపీ వద్దకు వెళ్లారని.. పోలీసుల తీరుపై ఫిర్యాదు చేశారని చెప్పుకొచ్చారు. అసుల పోలీసులు చేసిన ప్రతీ పనికి బాధ్యత వహించాల్సింది డీజీపీనే. చట్టాలను ఉల్లంఘిస్తూ.. మానవ హక్కులను హననం చేస్తూ.. రౌడీమూకల్లా పోలీసులు విరుచుకుపడుతున్న సమయంలో… పట్టించుకోని డీజీపీ.. హఠాత్తుగా.. ఇక నుంచి పోలీసులు ఎలాంటి ఇబ్బందులు పెట్టరని హామీ ఇచ్చారు.

ఇదంతా.. హైకోర్టు ఆగ్రహం ఫలితమేనని.. రైతులు అంటున్నారు. ఇక నుంచి ఆందోళనలకు ఎలాంటి ఆటంకాలు కల్పించబోమని.. డీజీపీ చెప్పినట్లుగా చెబుతున్నారు. ప్రజాస్వామ్యయుతంగా చేసుకునే ఆందోళనలకు.. అభ్యంతరం చెప్పబోమంటున్నారు. ప్రజాస్వామ్యయుతంగా చేసుకున్న నిరసనలపైనే ఇప్పటి వరకూ నిర్బంధాలు విధించారు. అలా చేయడం చట్ట విరుద్ధం. ఇక చట్టవిరుద్ధంగా ఏమీ చేయబోమని డీజీపీ పిలిచి మరీ హామీ ఇచ్చారు. న్యాయవ్యవస్థ జోక్యం వల్లే పోలీసులు తగ్గారని రైతులు అంటున్నారు.