‘స‌రిలేరు నీకెవ్వ‌రు’ త‌ర‌వాత మ‌హేష్ బాబు సినిమా ఏమిట‌న్న విష‌యంలో ఇప్ప‌టి వ‌ర‌కూ ఓ క్లారిటీ రాలేదు. వంశీ పైడిప‌ల్లితో సినిమా చేయాల్సివున్నా, అది ఆగిపోయింది. ప‌ర‌శురామ్ లైన్‌లోకి వ‌చ్చినా… ఈ సినిమా ఎప్పుడు ప‌ట్టాలెక్కుతుందో ఎవ్వ‌రూ చెప్ప‌లేని ప‌రిస్థితి. మ‌హేష్ బాబు లాంటి స్టార్ హీరోకి.. ఇప్పుడు ద‌ర్శ‌కుడు క‌రువ‌వ్వ‌డం విచిత్ర‌మైన ప‌రిస్థితే. ద‌ర్శ‌కులంతా ఎవ‌రి సినిమాల్లో వాళ్లు బిజీగా ఉండ‌డం వ‌ల్ల.. మ‌హేష్ స్థాయికి త‌గిన ద‌ర్శ‌కుడెవ‌రూ దొర‌క‌లేదు.

ఈలోగా.. మ‌హేష్ అనిల్ రావిపూడి ముందు ఓ ప్ర‌పోజ‌ల్ పెట్టాడ‌ట‌. ‘స‌రిలేరు నీకెవ్వ‌రు’లానే.. వీలైనంత త్వ‌ర‌గా ముగించేసే ప్రాజెక్టు ఏదైనా తీసుకుర‌మ్మ‌న్నాడ‌ట‌. ‘స‌రిలేరు…’ త‌ర‌వాత అనిల్‌తో మ‌రో సినిమా చేస్తాన‌ని మ‌హేష్ మాటిచ్చాడు. ఎలాగూ.. `ఎఫ్ 3`కి స‌మ‌యం ఉంది క‌దా, ఈలోగా త‌న‌తో సినిమా తీయొచ్చు క‌దా… అన్న‌ది మ‌హేష్ ఆలోచ‌న‌. అయితే ఈ ప్ర‌పోజ‌ల్‌కి అనిల్ రావిపూడి ఒప్పుకోలేద‌ని తెలుస్తోంది. టార్గెట్ పెట్టుకుని సినిమా పూర్తి చేయాల‌నుకుంటే క్వాలిటీ దెబ్బ‌తింటుంద‌ని, ఈసారి మ‌రింత మంచి క‌థ‌తో, మ‌రింత మంచి అవుట్ పుట్ ఇచ్చే సినిమా తీద్దామ‌ని, అందుకోసం కొంత స‌మ‌యం ప‌డుతుంద‌ని చెప్పాడ‌ట‌. పైగా `ఎఫ్‌3 `కోసం దిల్ రాజుకి అనిల్ రావిపూడి మాటిచ్చేశాడు. అనిల్ రావిపూడి త‌దుప‌రి సినిమా ఏదైనా స‌రే.. దిల్ రాజు బ్యాన‌ర్‌లోనే చేయాలి. సో.. మ‌హేష్ ఈక్వేష‌న్స్ ఇక్క‌డ పని చేయ‌లేదు.