దివంగ‌త తార శ్రీ‌దేవికి ఏఎన్నార్ జాతీయ పుర‌స్కారం ల‌భించింది. 2018గానూ శ్రీ‌దేవికి ఈ అవార్డు ప్ర‌క‌టించారు. 2019కి గానూ రేఖ ఈ అవార్డు అందుకోబోతున్నారు. ఈనెల 17న హైద‌రాబాద్‌లోని అన్న‌పూర్ణ స్డూడియోస్‌లో ఈ పుర‌స్కార ప్ర‌దాన కార్య‌క్ర‌మం నిర్వ‌హిస్తారు. చిరంజీవి చేతుల మీదుగా ఈ అవార్డులు అంద‌జేస్తారు. శ్రీ‌దేవి త‌ర‌పున‌ బోనీక‌పూర్‌, జాన్వీక‌పూర్ ఈ అవార్డు స్వీక‌రిస్తారు. అవార్డు కింద రూ.5 ల‌క్ష‌ల న‌గ‌దుతో పాటు, జ్ఞాపిక కూడా అంద‌జేస్తారు.

నాన్న‌గారి కోరిక‌

శ్రీ‌దేవికి త‌న పేరుమీదున్న అవార్డు ఇవ్వాల‌న్న‌ది నాన్న కోరిక అన్నారు నాగార్జున‌. అయితే అనివార్య కార‌ణాల వ‌ల్ల అది సాధ్య‌ప‌డ‌లేద‌ని, ఇన్నాళ్ల‌కు ఆమెకు అవార్డు అందివ్వ‌గ‌లుగుతున్నామ‌న్నారు. రేఖ‌తో కూడా నాన్న‌కి మంచి అనుబంధం ఉంద‌ని, అందుకే అవార్డు సంగ‌తి చెప్ప‌గానే రేఖ త‌ప్ప‌కుండా వ‌స్తానని మాట ఇచ్చార‌ని నాగ్ చెప్పారు. ఇదే కార్య‌క్ర‌మంలో అన్న‌పూర్ణ ఫిల్మ్ స్కూల్‌లో డిగ్రీ పూర్తి చేసిన 70 మంది విద్యార్థుల‌కు ప‌ట్టాలు అందివ్వ‌బోతున్నారు.