చిరంజీవి క‌థానాయ‌కుడిగా వ‌శిష్ట ద‌ర్శ‌క‌త్వంలో ఓ చిత్రం రూపుదిద్దుకొంటున్న సంగ‌తి తెలిసిందే. విశ్వంభ‌ర అనే టైటిల్ ప‌రిశీలిస్తున్నారు. ఇటీవ‌లే రెగ్యుల‌ర్ షూటింగ్ మొదలైంది. ఈ చిత్రంలో ఐదుగురు హీరోయిన్లు ఉంటార‌న్న సంగతి తెలిసిందే. ఓ పాత్ర కోసం అనుష్క పేరు ప‌రిశీలించారు. ఆమె దాదాపుగా ఖాయం అనుకొన్నారు. అయితే ఆ స్థానంలో ఇప్పుడు త్రిష వ‌చ్చి చేరింద‌ని స‌మాచారం. జ‌న‌ని పాత్ర‌లో త్రిష క‌నిపించ‌బోతోంద‌ని తెలుస్తోంది. స్టాలిన్ త‌ర‌వాత చిరంజీవితో జోడీ క‌ట్ట‌డం త్రిష‌కు ఇదే తొలిసారి. భీమ‌వ‌రం దొర‌బాబు పాత్ర‌లో చిరంజీవి న‌టించ‌బోతున్నాడ‌ని తెలుగు 360 ముందే వెల్ల‌డించింది.

మృణాల్ ఠాకూర్ మ‌రో క‌థానాయిక‌గా క‌నిపించ‌బోతోంది. మిగిలిన ముగ్గురు హీరోయిన్లు ఎవ‌రన్న‌ది క్లారిటీ రావాల్సివుంది. ఈ చిత్రంలో రానా ప్ర‌తినాయ‌కుడి పాత్ర పోషిస్తున్నాడు. ఆయ‌న సెట‌ప్, గెట‌ప్ కూడా కొత్త‌గా ఉండ‌బోతున్నాయ‌ట‌. జ‌గ‌దేక వీరుడు – అతిలోక సుంద‌రిలాంటి ఫాంట‌సీ సినిమా ఇది. గ్రాఫిక్స్ కి పెద్ద పీట వేస్తున్నారు. కీర‌వాణి సంగీతాన్ని స‌మ‌కూరుస్తున్నారు. యూవీ క్రియేష‌న్స్ సంస్థ నిర్మిస్తోంది.