అనుష్క‌తో ప‌నిచేయ‌డానికి హీరోల‌తో పాటు, ద‌ర్శ‌కులూ రెడీగా ఉంటారు. ఎందుకంటే అనుష్క ప్రొఫెష‌న‌లిజం అలాంటిది. ఇండ్ర‌స్ట్రీలో ఉన్న ప్రతి అగ్ర ద‌ర్శ‌కుడితోనూ స్వీటీ ప‌నిచేసింది. ప్ర‌తి ఒక్క‌రితోనూ ప్ర‌త్యేక‌మైన అనుబంధం ఉంది. అలాంటి ద‌ర్శ‌కుల‌లో మీరు ఎవ‌రికి రుణ‌ప‌డి ఉంటారు? అని అడిగితే – మ‌రేమాత్రం త‌డుముకోకుండా పూరి జ‌గ‌న్నాథ్ పేరే చెప్పింది.

అనుష్క తొలి చిత్రం సూప‌ర్‌. అది యావ‌రేజ్‌. అంత‌కంటే మంచి పాత్ర‌లు, పెద్ద హిట్లు త‌న కెరీర్‌లో ఎన్నో చూసింది అనుష్క‌. త‌న కెరీర్‌లో అరుంధ‌తి, బాహుబ‌లి లాంటి భారీ విజ‌యాలున్నాయి. అయితే అలాంటి సినిమాల్ని అందించిన ద‌ర్శ‌కుల్ని కాద‌ని, పూరి పేరు త‌ల‌చుకోవ‌డానికి ఓ బ‌ల‌మైన కార‌ణం ఉంది. సూప‌ర్ అనుష్క తొలి చిత్రం. ఆ స‌మ‌యానికి త‌న‌కు కెమెరా అంటే ఏమిటో, న‌ట‌న అంటే ఏమిటో కూడా తెలీదు. డాన్స్ రాదు. అలాంటి స‌మ‌యంలో ఓన‌మాల‌న్నీ నేర్పించాడు పూరి. అనుష్క‌కి త‌న‌పై త‌న‌కు న‌మ్మ‌కాన్ని క‌లిగించాడు. అస‌లు ఈ సినిమాలు వ‌ద్దురా బాబోయ్ – అనుకుని పారిపోవాల‌నుకున్న అనుష్క‌ని సూప‌ర్ తో నిల‌బెట్టాడు. సూప‌ర్ యావ‌రేజే కావొచ్చు, కానీ ఆ సినిమా త‌ర‌వాత అనుష్క‌కు చాలా ఆఫ‌ర్లు వ‌చ్చాయి. అందుకే… అలాంటి అద్భుత‌మైన అవ‌కాశాన్ని అందించిన పూరినే స్పెష‌ల్ అంటోంది అనుష్క‌. అదీ నిజ‌మే క‌దూ.