ఆంధ్రప్రదేశ్‌లో ముగ్గురు సీనియర్ ఐపీఎస్ అధికారులను బదిలీ చేస్తూ… కేంద్ర ఎన్నికల సంఘం తీసుకున్న నిర్ణయాన్ని తిప్పికొట్టేందుకు ఏపీ ప్రభుత్వం అన్ని రకాల ప్రయత్నాలు చేస్తోంది. వైసీపీ కోరిక మేరకు.. కేవలం ఆ పార్టీకి లబ్ది చేకూర్చేందుకే.. ఎలాంటి ఆరోపణలు లేకపోయినా… వివరణ కూడా అడగకుండా బదిలీ చేశారని.. టీడీపీ నిర్ణయానికి వచ్చింది. అందుకే.. ముందుగా.. ఈ అంశంపై.. హైకోర్టులో పిటిషన్ వేశారు. ఎన్నికల విధుల్లో ఉన్న వారిపై మాత్రం.. ఈసీకి అధారిటీ ఉంటుందని… ఎన్నికల్లో విధుల్లో లేని వారిని బదిలీ చేసే హక్కు ఈసీకి ఉండదని.. టీడీపీ పిటిషన్ లో పేర్కొంది. ధర్మాసనం ముందు అదే వాదించింది. దీంతో ఎన్నికల విధుల్లో ఇంటెలిజెన్స్‌ డీజీ లేరన్న అధికారిక పత్రాలను సమర్పించాలని హైకోర్టు ఆదేశించింది. అదే సమయంలో ఈ బదిలీలపై సమగ్ర వివరాలతో ప్రమాణపత్రం దాఖలు చేయాలని ఈసీని ఆదేశించింది. గురువారం మరోసారి ఈ కేసు విచారణ చేపట్టనున్నారు.
మరో వైపు.. ఈసీ అధికారాలను కేవలం ఎన్నికల విధులు నిర్వహించే అధికారుల వరకే పరిమితం చేసేందుకు ప్రభుత్వం… ఓ జీవో తీసుకొచ్చింది. దాని ప్రకారం… కానిస్టేబుల్ నుంచి డీజీపీ వరకూ ఎన్నికల విధుల్లో పాల్గొనేవారందరూ.. ఈసీ పరిధిలోకి వస్తారు. కానీ ఇందులో.. ఇంటలిజెన్స్ డీజీని మినహాయించారు. అంటే.. ఏపీ ప్రభుత్వం విడుదల చేసిన జీవో ప్రకారం.. ఇంటలిజెన్స్ డీజీని బదిలీ చేసే అధికారం.. ఈసీకి ఉండదు. ఈ జీవో విడుదల చేసిన కొద్ది సేపటికే.. ఏపీ ప్రభుత్వం… ఏపీ ఇంటెలిజెన్స్‌ డీజీ ఏబీ వెంకటేశ్వరరావు బదిలీ రద్దు చేస్తూ ఉత్తర్వులు జారీ చేసింది. నిబంధనల ప్రకారం ఇంటెలిజెన్స్‌ డీజీ ఈసీ పరిధిలోకి రానందున.. బదిలీ ఉత్తర్వులు రద్దు చేస్తున్నట్లు ప్రకటించారు. కడప, శ్రీకాకుళం ఎస్పీలను మాత్రమే బదిలీ చేస్తున్నట్లు ఉత్తర్వులు ఇచ్చారు. ఏపీ ప్రభుత్వం వేసిన పిటిషన్‌పై ఇంప్లీడ్ అవుతామని వైసీపీ పిటిషన్ వేసింది. దానిపై.. వాదనలు తర్వాత వింటామని ధర్మాసనం తెలిపింది.
మొత్తానికి ఈసీ బదిలీలు వివాదాస్పదం అయ్యాయి. కేవలం వైసీపీ నేతలు… తమ కోరికల చిట్టాను ఫిర్యాదుల రూపంలో ఇచ్చిన ఇరవై నాలుగు గంటలు గడవక ముందే.. బదిలీ చేయడం… ఎప్పుడూ జరగలేదు. లెక్క ప్రకారం…ఇలాంటి ఫిర్యాదులొచ్చినప్పుడు సంబంధిత రాష్ట్ర సీఈవో నుంచి నివేదిక తెప్పించుకుంటారు. ఇక్కడ అలాంటిదేమీ లేదు. ఇరవై నాలుగు గంటల్లోనే… ఆదేశాలిచ్చారు. దాంతో.. ఈసీ తీరు అనుమానాస్పదంగా మారింది.
