ఎందుకో స్ట్ర‌యిట్ తెలుగు సినిమా అనేస‌రికి మురుగ‌దాస్ కంగారు ప‌డుతున్నాడు. అప్పట్లో స్టాలీన్‌, మొన్న‌టి స్పైడ‌ర్ సినిమాలే ఇందుకు రుజువులు. స్పైడర్ విష‌యంలో మాత్రం మురుగ‌దాస్ చాలా విమ‌ర్శ‌లు ఎదుర్కున్నాడు. ముఖ్యంగా మ‌హేష్ ఫ్యాన్స్ నుంచి. ఆ సినిమా ఫ్లాప్ అటు మ‌హేష్‌నీ, ఇటు మురుగ‌దాస్‌నీ చాలా బాధ పెట్టింది. ఆ ఫ్లాప్‌గురించి మురుగ‌దాస్ ఇప్ప‌టికీ త‌ల‌చుకుంటూనే ఉన్నాడు.

“మ‌హేష్‌కి ఫ్లాప్ ఇచ్చాన‌న్న బాధ న‌న్ను వెంటాడుతూనే ఉంది. ఆ సినిమా విష‌యంలో ఏదో త‌ప్పు జ‌రుగుతుంద‌ని ముందు నుంచీ తెలుస్తూనే ఉంది. అదేమిట‌న్న‌ది క‌నిపెట్ట‌లేక‌పోయాను. దాంతో మా అంచ‌నాల‌న్నీ త‌ప్పేలా చేసింది. ఓ సినిమా హిట్ట‌యితేనే హీరో, ద‌ర్శ‌కుడి మ‌ధ్య అనుబంధం ఉంటుంది. లేదంటే లేదు. కానీ మ‌హేష్ మాత్రం వేరు. ఆయ‌న రూప‌మే కాదు. మ‌న‌సు కూడా బంగారం. స్పైడ‌ర్ ఫ్లాప్ అయిన త‌ర‌వాత కూడా ఆయ‌న త‌న స్నేహం కొన‌సాగించారు. ప‌ది రోజుల పాటు వ‌రుస‌గా ఫోన్లు చేస్తూ, మెసేజ్‌లు పెట్టేవారు. సినిమాల్లో ఇవ‌న్నీ మామూలే ప‌ట్టించుకోకండి.. అని భ‌రోసా ఇచ్చేవారు. అలాంటి హీరోని నేను చూడ‌లేదు” అని మ‌హేష్ గురించి చెప్పుకొచ్చాడు మురుగ‌దాస్‌.