వైఎస్ జగన్మోహన్ రెడ్డిపై… విశాఖ ఎయిర్ పోర్టులో జరిగిన దాడి వ్యవహారం… రాజకీయంగా… ఓ సునామీలా మారుతోంది. అది టీడీపీ అధినేత చంద్రబాబే చేయించారంటూ… వైసీపీ, వైసీపీ మీడియా… లాజిక్ లేని ఆధారాలతో.. కొత్త కొత్తగా.. ప్రచారం చేస్తోంది. పోలీసుల విచారణపై నమ్మకం లేదని చెబుతూ.. స్వయం విచారణ చెబుతోంది. ఏమీ లేకపోయినా…. ఓ రెస్టారెంట్ కౌంటర్‌ను మార్క్ చేసి.. అక్కడ సీసీ కెమెరాలు ఎందుకు పెట్టలేదన్న లాజిక్‌లు తీసి… చిత్ర విచిత్రమైన సందేహాలు లెవనెత్తి .. వీలైతే కొన్ని మార్ఫింగ్‌లు చేసి.. వ్యవహారం మొత్తాన్ని టీడీపీ అధినేతపై నెట్టేందుకు మ్యాగ్జిమం ప్రయత్నిస్తున్నారు.
దీనికి తెలుగుదేశం పార్టీ నేతలు… కౌంటర్ ఇచ్చేందుకు ఎప్పటికప్పుడు ప్రయత్నిస్తున్నారు. ఈ విషయంలో.. ఎమ్మెల్సీ బాబూ రాజేంద్రప్రసాద్ మాత్రం.. లిమిట్స్ క్రాస్ చేసేశారు. వైసీపీ నేతలు… పద్దతి లేకుండా… టీడీపీని గురిపెట్టారని..తాను కూడా పద్దతి లేకుండా ఆరోపణలు ప్రారంభించారు. జగన్ పై దాడి వెనుక విజయమ్మ, షర్మిలమ్మ ఉన్నారని తేల్చారు. జగన్ పై దాడి చేస్తే టీడీపీ కి ఎలాంటి లాభం లేదని తేల్చారు. దాడి ఎపిసోడ్‌పై పలు అనుమానాలున్నాయన్నారు. అంతటితో ఆగిపోతే సరిపోయేది.. కానీ జగన్ కుటుంబంలో అనేక విబేధాలు ఉన్నాయని , విజయమ్మ , షర్మిలను జగన్ అణగదొక్కుతున్నారని అందుకే… జగన్ కుటుంబ సభ్యులే దాడికి కుట్ర పన్నారనే అనుమానం ఉందన్నారు. సానుభూతి ఓట్లతో గద్దె ఎక్కాలని విజయమ్మ, షర్మిల కుట్రపన్నారని అనిపిస్తోందన్నారు. ఆ కోణంలో విచారణ చేయాలని పోలీసులను కోరుతున్నానని రాజేంద్రప్రసాద్ ప్రకటించారు.
వైసీపీ నేతలు చేస్తున్న ఆరోపణలను.. ఇప్పటి వరకూ టీడీపీ శ్రేణులు పద్దతిగానే తిప్పికొట్టే ప్రయత్నం చేశాయి. కానీ బాబూ రాజేంద్రప్రసాద్ మాత్రం.. దాన్ని వైసీపీ రూట్‌లోకి తీసుకెళ్లారన్న అభిప్రాయం వ్యక్తమవుతోంది. ఇలాంటి విమర్శలు చేయడం వల్ల.. వచ్చే రాజకీయ మైలేజీ ఏమీ ఉండదు. కొంత పబ్లిసిటీ వస్తుందేమో..? కానీ ప్రజల్లో మాత్రం బ్యాడ్ ఇమేజ్ పడిపోతుంది.
