బాల‌కృష్ణ – బి.గోపాల్ ల‌ది సూప‌ర్ డూప‌ర్ హిట్ కాంబినేషన్. స‌మ‌ర‌సింహారెడ్డి, న‌ర‌సింహ‌నాయుడు చిత్రాలైతే బాక్సాఫీసు ద‌గ్గ‌ర కొత్త చ‌రిత్ర‌ని లిఖించాయి. ఇప్పుడు మ‌ళ్లీ ఈ కాంబినేషన్ సెట్ కాబోతోంది. బాల‌య్య‌తో బి.గోపాల్ ఓ సినిమా చేస్తార‌ని ముందు నుంచీ ప్ర‌చారం జ‌రుగుతోంది. కానీ ఇందుకు సంబంధించిన అధికారిక ప్ర‌క‌ట‌న ఏదీ రాలేదు. ఇప్పుడు బి.గోపాల్ నోటి నుంచి ఈ కాంబో గురించిన వార్త బ‌య‌టకు వ‌చ్చింది. `బాల‌య్య‌తో త్వ‌ర‌లోనే సినిమా తీస్తా..` అని చెప్పేశారాయ‌న.
“బాల‌య్య‌తో ఓ సినిమా చేస్తున్నా. మంచి క‌థ కోసం వెదుకుతున్నాం. కొన్ని క‌థ‌లు విన్నాను. అయితే ఇప్ప‌టి వ‌ర‌కూ ఏ క‌థ‌నీ లాక్ చేయ‌లేదు. త్వ‌ర‌లోనే ఓ నిర్ణ‌యానికి వ‌స్తాం“ అని చెప్పుకొచ్చారు గోపాల్. ఈసారి కూడా ఫ్యాక్ష‌న్ క‌థే ఉండొచ్చ‌న్న‌ది టాక్‌. “స‌మ‌ర‌సింహారెడ్డి ఫ్యాక్ష‌న్ క‌థా చిత్రాల్లో మైలురాయి. బాల‌య్య‌తో మ‌ళ్లీ అలాంటి సినిమానే చేయాల‌నివుంది.“ అని గోపాల్ ముక్తాయించారు. బి.గోపాల్ ద‌ర్శ‌క‌త్వం వ‌హించిన `ఆర‌డుగుల బుల్లెట్‌` ఈవారంలోనే విడుద‌ల అవుతోంది. గోపీచంద్ క‌థానాయ‌కుడిగా న‌టించిన ఈ చిత్రానికి న‌య‌న‌తార క‌థానాయిక. బాల‌య్య చేతిలో చాలా సినిమాలున్నాయిప్పుడు. యువ ద‌ర్శ‌కులు చాలామంది బాల‌య్య చుట్టూ తిరుగుతున్నారు. బి.గోపాల్ కి అవ‌కాశం రావ‌డం కొంచెం క‌ష్ట‌మే. కానీ బాల‌య్య‌కి గోపాల్ అంటే ప్ర‌త్యేక‌మైన అభిమానం. బాల‌య్య అనుకోవాలే గానీ – రేపే ఈ సినిమా ప‌ట్టాలెక్కేయొచ్చు.
