డ్యూయ‌ల్ రోల్ అంటే బాల‌కృష్ణ‌కు చాలా ఇష్టం. ఒకే సినిమాలో రెండు పాత్ర‌ల్లో క‌నిపించ‌డం త‌న‌కు అల‌వాటుగా మారుతోంది. రెండు పాత్ర‌లు కాక‌పోయినా, రెండు షేడ్స్ ఉన్న పాత్ర‌ల్లో క‌నిపిస్తూ త‌న ముచ్చ‌ట తీర్చుకుంటుంటాడు. ఇప్పుడు బోయ‌పాటి సినిమాలోనూ అంతే. ఈ సినిమాలో బాల‌య్య పాత్ర రెండు షేడ్స్‌లో ఉంటుంద‌ని ప్ర‌చారం సాగుతోంది. నిజానికి అవి రెండు షేడ్స్ కావు. రెండు పాత్ర‌లు.

ఇది క‌వ‌ల సోద‌రుల క‌థ‌. చిన్న‌ప్పుడే ఈ సోద‌రులు విడిపోతారు. ఒక‌రు కాశీలో మ‌రొక‌రు అనంత‌పురంలో పెరిగి పెద్ద‌వాళ్ల‌వుతాయి. కాశీలో పెరిగిన బాల‌య్య అఘోరాగా మార‌తాడు. వాళ్లిద్ద‌రి మ‌ధ్య ఏం జ‌రిగింద‌న్న‌దే క‌థ‌. విశ్రాంతి ముందు అఘోరా పాత్ర ప‌రిచ‌యం అవుతుంది. ద్వితీయార్థం అంతా.. ఆ పాత్ర చుట్టూనే తిరుగుతుంద‌ని తెలుస్తోంది. అఘోరా గెట‌ప్ కోస‌మే ఇప్పుడు కుస్తీలు ప‌డుతున్నాడు బాల‌య్య‌. త‌న గెట‌ప్ ఎలా ఉండాలి? ఏ త‌ర‌హా విగ్ వాడాలి? అనే విష‌యంలో త‌ర్జ‌న భ‌ర్జ‌న‌లు జ‌రుగుతున్నాయి. అఘోరా గెట‌ప్‌లో కొన్ని ఫొటో షూట్‌లూ జ‌రిగాయ‌ని, అయితే బాల‌య్య సంతృప్తి చెంద‌క‌పోవ‌డంతో ఇప్ప‌టి వ‌ర‌కూ లుక్ ఖ‌రారు కాలేద‌ని తెలుస్తోంది.