కేసీఆర్ తో చిత్ర‌సీమ పెట్టుకున్న మీటింగ్‌కి నంద‌మూరి బాల‌కృష్ణ‌ని పిల‌వ‌లేదు. జ‌గ‌న్ తో మీటింగ్‌కి పిలిచినా బాల‌య్య వెళ్ల‌లేదు. అలా రెండు కీల‌క‌మైన స‌మావేశాలు బాల‌య్య లేకుండానే జ‌రిగిపోయాయి. అయితే… జ‌గ‌న్‌తో మీటింగ్ విశేషాల గురించి బాల‌య్య సినీ ప్ర‌ముఖుల‌ని ఆరా తీసిన‌ట్టు ఇన్‌సైడ్ టాక్‌.

బుధ‌వారం బాల‌కృష్ణ త‌న పుట్టిన రోజు జ‌రుపుకున్నారు. ఈ సంద‌ర్భంగా సి.క‌ల్యాణ్‌, సురేష్‌బాబు… బాల‌య్య‌ని క‌లిసి శుభాకాంక్ష‌లు తెలిపారు. ఇటీవ‌ల జ‌గ‌న్ మీటింగ్‌కి వీళ్లిద్ద‌రూ వెళ్లి వ‌చ్చిన‌వాళ్లే. ఈ సంద‌ర్భంగా బాల‌య్య‌… జ‌గ‌న్ మీటింగ్ విశేషాల్ని అడిగి తెలుసుకున్న‌ట్టు టాక్‌. జ‌గ‌న్ ఏయే విష‌యాల‌పై సానుకూలంగా స్పందించారో బాల‌య్య తెలుసుకోవ‌డానికి ఉత్సాహం చూపించార్ట‌. విశాఖ‌లో షూటింగ్ జ‌రుపుకోవ‌డానికి చాలా ఉత్సాహంగా ఉన్నాన‌ని బాల‌య్య స‌న్నిహితుల‌తో చెప్పుకొచ్చార్ట‌. నంది పుర‌స్కారాల విష‌యంపైనా బాల‌య్య ఆరా తీశార‌ని తెలుస్తోంది. బాల‌య్య మీటింగ్‌కి వెళ్ల‌క‌పోయినా, అక్క‌డి విశేషాల‌పై ఆస‌క్తి చూపించ‌డం క‌ల్యాణ్‌, సురేష్‌బాబు లాంటి వాళ్ల‌కు ఊర‌ట ఇచ్చే విష‌య‌మే. ఎందుకంటే… బాల‌య్య గైర్హాజ‌రీతో ఈ మీటింగుల‌కు కాస్త క‌ళ త‌ప్పిన‌ట్టైంది. బాల‌య్య‌తో కొంత‌మందికి గ్యాప్ కూడా వ‌చ్చింది. కానీ ఇప్పుడు బాల‌కృష్ణ స్పంద‌న‌తో కాస్త ఉప‌శ‌మ‌నం దొరికింది.