సూప‌ర్ హీరో క‌థ‌ల‌పై టాలీవుడ్ మ‌క్కువ చూపిస్తోంది. ‘హ‌నుమాన్‌’తో ప్రశాంత్ వ‌ర్మ సూప‌ర్ హీరో మానియాని టాలీవుడ్ కి అంటించేశాడు. దాంతో… ఆ త‌ర‌హా క‌థ‌ల‌పై దృష్టి పెడుతున్నారు మ‌న హీరోలు. తాజాగా.. నంద‌మూరి బాల‌కృష్ణ కూడా సూప‌ర్ హీరో అవ‌తారం ఎత్త‌బోతున్నార‌ని టాక్‌. బాల‌కృష్ణ‌కు సంబంధించిన ఓ పిక్ సోష‌ల్ మీడియాలో వైర‌ల్ అవుతోంది. అందులో బాల‌య్య గెట‌ప్ సూప‌ర్ హీరోలానే ఉంది. దాంతో బాల‌య్య సూప‌ర్ హీరోలా క‌నిపించ‌నున్నాడ‌ని, ఈ ప్రాజెక్ట్ అతి త్వ‌ర‌లోనే ప్ర‌క‌టిస్తారంటూ ఓ ప్ర‌చారం మొద‌లైంది.

ఈ పిక్ వెనుక రెండు విష‌యాలు ఉండి ఉండొచ్చు. ఒక‌టి బాల‌కృష్ణ ‘అన్ స్టాప‌బుల్ 3’ సీజ‌న్ చేస్తున్నారు. ఆ సీజ‌న్ కు సంబంధించిన ప్రోమో.. ఒక‌టి షూట్ చేశారు. ఆ ప్రోమోలో బాల‌య్య సూప‌ర్ మాన్ అవ‌తారంలో క‌నిపించే ఛాన్స్ వుంది. రెండోది ప్ర‌శాంత్ వ‌ర్మ ద‌ర్శ‌క‌త్వంలో మోక్ష‌జ్ఞ ఓ సినిమా చేస్తున్నాడు. ఇందులో బాల‌కృష్ణ కూడా న‌టించ‌బోతున్నారు. అందులో బాల‌య్య పాత్ర సూప‌ర్ హీరో అయ్యి ఉండొచ్చు.

మ‌రోవైపు ‘అన్ స్టాప‌బుల్ 3’ సీజ‌న్ కు సంబంధించిన షూటింగ్ జ‌రుగుతోంది. అల్లు అర్జున్ పై ఓ ఎపిసోడ్ షూట్ చేశారు. ఇందులో అయాన్‌, అర్హ‌లు కూడా క‌నిపించ‌బోతున్నార‌ని టాక్‌. అయాన్, అర్హ‌లు ఇప్ప‌టి వ‌ర‌కూ మీడియా ముందుకు రాలేదు. వాళ్ల రాక‌తో ఈ ఎపిసోడ్ కి ఓ కొత్త క‌ళ వ‌చ్చిన‌ట్టే.