బాల‌య్యంతే. ఎప్పుడు ఎవ‌రికి ఎలా అవ‌కాశాలిస్తాడో చెప్ప‌లేం. హిట్లు లేని పూరి జ‌గ‌న్నాథ్‌తో సినిమా చేయ‌డానికి సై అన్నాడు. పైసా వ‌సూల్ వ‌చ్చింది. ఇప్పుడు బి.గోపాల్‌కి ఛాన్స్ ఇచ్చిన‌ట్టు తెలుస్తోంది. తెలుగు చిత్ర‌సీమ‌లో బాల‌య్య – బి.గోపాల్‌ల‌ది తిరుగులేని కాంబినేష‌న్‌. వీరిద్ద‌రి నుంచి ఎన్నో హిట్లు, సూప‌ర్ హిట్లు వచ్చాయి. తెలుగునాట ఓ ట్రెండ్ సృష్టించిన స‌మ‌ర‌సింహారెడ్డి… వీరి క‌ల‌యిక‌లో వ‌చ్చిన సినిమానే. కొంత‌కాలంగా బి.గోపాల్ సినిమాల‌కు దూరంగా ఉన్నారు. ఈమ‌ధ్య కాలంలో చేసిన ఒకే ఒక్క సినిమా – ఆర‌డుగుల బుల్లెట్ విడుద‌ల‌కు నోచుకోలేదు. అయినా స‌రే… బి.గోపాల్ కి బాల‌య్య నుంచి పిలుపు వెళ్లింద‌ట‌. ‘మ‌నం ఓ సినిమా చేస్తున్నాం.. క‌థ రెడీ చేసుకో’ అని బాల‌య్య సంకేతాలు అందించిన‌ట్టు తెలుస్తోంది. బాల‌య్య‌కోసం త‌గిన క‌థ త‌యారు చేసే ప‌నిలో ఉన్నార్ట గోపాల్‌. బెల్లంకొండ సురేష్ ఈ చిత్రానికి నిర్మాత‌గా వ్య‌వ‌హ‌రించే అవ‌కాశాలున్నాయి.