జనసేన పార్టీలో చేరినందుకు తాను పదవులు అడగలేదని ఒక్క సినిమా చేసుకునే చాన్స్ ఇవ్వాలని అడిగానని దానికి పవన్ అంగీకరించారని బాలినేని శ్రీనివాసరెడ్డి ప్లీనరీ సభలో చెప్పుకొచ్చారు. తన ఆస్తులన్నీ జగన్ కాజేశారని ఈ సందర్భంగా ఆయన కన్నీరు పెట్టుకున్నారు. జగన్ కాజేశారు కాబట్టి తనకు ఓ సినిమా చేసి తనను బయట పడేయాలని పవన్ పై ఆ బాధ్యత పెట్టినట్లుగా ఆయన మాట్లాడారు. ఈ విషయం పక్కన పెడితే అసలు పవన్ కల్యాణ్ ఇప్పుడున్న పరిస్థితుల్లో సినిమా చేయడం అనేది దాదాపుగా అసాధ్యం.
ప్రస్తుతం పూర్తి చేయాల్సిన సినిమాలు ఉన్నాయి. వాటికి రెండు, మూడు రోజులు కేటాయించడం కష్టంగా మారుతోంది. ఎప్పటికప్పుడు ఆ సినిమాలను వాయిదా వేసుకుంటూ పోతున్నారు. హరిహరవీరముల్లు, ఓజీ, ఉస్తాద్ భగత్ సింగ్ వంటి సినిమాలు ఉన్నాయి. వీరమల్లు సెకండ్ పార్టు కూడా ఉంది. వీటికి డేట్లు కేటాయించడమే గొప్ప విషయంగా మారింది. ఇక కొత్త సినిమా అంటే దాదాపుగా అసాధ్యం.
పవన్ తో సినిమా తీసి జగన్ కాజేసిన తన ఆస్తులను మళ్లీ సంపాదించుకోవాలని బాలినేని అనుకుంటున్నారు. తనను ఆర్థిక కష్టాల నుంచి పవన్ బయటపడేయాలని కోరుకుంటున్నారు. కానీ పవన్ కు అంత తీరిక ఉందా అన్నదే అసలు ప్రశ్న. బాలినేనికి ఎట్టి పరిస్థితుల్లోనూ సినిమా చేయాలని పవన్ అనుకుంటే దానికి మరో నాలుగైదేళ్ల సమయం పట్టే అవకాశం ఉంది.
