మెగా కుటంబ వీరవిధేయుడు బండ్ల గణేష్ అనూహ్యంగా కాంగ్రెస్ పార్టీలో చేరిపోయారు. టీ పీసీసీ చీఫ్ ఉత్తమ్ కుమార్ రెడ్డితో కలిసి… ఢిల్లీ వెళ్లిన ఆయన రాహుల్ గాంధీ సమక్షంలో కాంగ్రెస్ పార్టీ కండువా కప్పుకున్నారు. జనసేన అధినేత పవన్ కల్యాణ్ భక్తుడిగా చెప్పుకోవడానికి ఏ మాత్రం సంకోచించని .. గణేష్.. తన రాజకీయ జీవితానికి కాంగ్రెస్‌ను చాయిస్‌గా ఎంచుకున్నారు. కాంగ్రెస్ పార్టీ ఏది చెప్తే అది చేస్తానని, ఎక్కడి నుంచి పోటీ చేయమంటే అక్కడి నుంచి పోటీ చేస్తానని గణేష్ ప్రకటించారు. శాసనసభ్యుడిగా ప్రమాణ స్వీకారం చేయాలనేదే తన జీవితాశయమని ఆయన చెప్పుకొచ్చారు. కాంగ్రెస్ పార్టీలో చేరినందుకు ఆనందంగా, గర్వంగా ఉందని కూడా చెప్పుకొచ్చారు.
బండ్ల గణేష్ కాంగ్రెస్ పార్టీలో చేరడం అందర్నీ ఆశ్చర్యపరిచింది. ఎందుకంటే.. జనసేన పార్టీ పెట్టినప్పటి నుంచి ఆ పార్టీపై ఎక్కడ లేని అభిమానాన్ని గణేష్ ప్రదర్శించేవారు. ఏ చానల్‌కి కానీ.. ఏ వెబ్ మీడియాకు కానీ.. ఇంటర్యూలు ఇచ్చినా.. ఏపీలో.. జనసేన అధినేత పవన్ కల్యాణ్.. ప్రమాణస్వీకారం చేయడమే మిగిలిందని… చెప్పుకొచ్చేవారు. వార్ వన్ సైడేనని సినిమాటిక్‌గా చెప్పేవారు. పవన్ కల్యాణ్ అనుమతిస్తే… అనుగ్రహిస్తే.. తాను ఎమ్మెల్యే, ఎంపీ అవుతానని ఆశ పడేవారు. గెలుపుపై అంత నమ్మకం ఉన్నప్పుడు బండ్ల గణేష్ ఎందుకు జనసేనలో చేరలేదన్నదానిపై.. ఆయన కూడా సరైన వివరణ ఇవ్వలేకపోతున్నారు. అయితే పవన్ కల్యాణ్ అంటే.. తనకు తండ్రిలాంటి వారని చెప్పి అభిమానాన్ని మాత్రం చాటుకున్నారు. ప
ఒకప్పుడు చిన్న స్థాయి కమెడియన్‌గా ఉన్న బండ్ల గణేష్ ఒక్కసారిగా బడా ప్రొడ్యూసర్‌గా ఎదిగారు. అప్పట్లో కాంగ్రెస్ ప్రభుత్వంలో మంత్రిగా ఉన్న ఓ ఉత్తరాంధ్ర నేతకు బినామీ అన్న ప్రచారం జరిగింది. అయితే.. వీటిని గణేష్ ఖండించారు. ఆ తర్వాత అనేక వివాదాల్లో చిక్కుకున్నారు. పవన్ కల్యాణ్‌తో గబ్బర్ సింగ్ నిర్మించారు. ఎన్టీఆర్, రామ్‌చరణ్‌లతోనూ సినిమాలు తీశారు. అయితే ఇటీవలి కాలంలో అనేక వివాదాల్లో చిక్కుకున్నారు. చెక్ బౌన్స్ కేసులతో… కోర్టుల చుట్టూ తిరుగుతున్నారు. మొన్న ప్రొద్దుటూరు కోర్టులో.. వందకుపైగా .. చెక్ బౌన్స్ కేసులున్నట్లు బయటపడిది. కోర్టుకు కూడా హాజరై వచ్చారు. ఇలాంటి వివాదాస్పద ప్రవర్తన వల్లే… పవన్ కల్యాణ్.. బండ్ల గణేష్‌ను పార్టీలోకి తీసుకోలేదన్న ప్రచారం జరుగుతోంది. అందుకే ఆయన కాంగ్రెస్ పార్టీలో చేరినట్లు తెలుస్తోంది.
