బండ్ల గ‌ణేష్‌లో ఏదో ఓ మ్యాజిక్ ఉంది. పెద్ద పెద్ద హీరోల్ని బాగా బుట్ట‌లో వేసుకుంటాడు. ప‌వ‌న్, ఎన్టీఆర్‌, అల్లు అర్జున్ ల‌తో సినిమాలు తీయ‌గ‌లిగాడంటే… ఆ టెక్నిక్కే కార‌ణం. నిజానికి ప్రభాస్ తో కూడా సినిమా తీసే ఆఫ‌ర్ బండ్ల గ‌ణేష్‌కి వ‌చ్చింది. `మీతో సినిమా తీయాల‌నివుంది` అని అడ‌గ్గానే ప్రభాస్ `స‌రే` అన‌డం.. లారెన్స్ ద‌గ్గ‌ర‌కు వెళ్లి క‌థ విన‌డం జ‌రిగాయ‌ట. కానీ.. ఎందుకో ఆ సినిమాని వ‌దులుకోవాల్సివ‌చ్చింది బండ్ల. ”నా జీవితంలో పెద్ద లోటు. చేతిలోకి వ‌చ్చిన అవ‌కాశం చేజార్చుకున్నానంటే అదే. ఇండియ‌న్ సూప‌ర్ స్టార్ అయిపోయాడు ప్రభాస్. త‌నతో ఆ రోజు సినిమా చేయ‌లేక‌పోయాను” అని ఓ ఇంట‌ర్వ్యూలో వాపోయాడు బండ్ల.
నిజానికి బండ్ల గ‌ణేష్ ఆ సినిమా చేయ‌కపోవ‌డ‌మే ప్ల‌స్ అయ్యింది. ఎందుకంటే.. లారెన్స్‌తో ప్రభాస్ తీసిన `రెబ‌ల్‌` భారీ ఫ్లాప్‌. ఆ సినిమా నిర్మాత‌ల‌తో లారెన్స్ పంచాయితీ కూడా పెట్టుకున్నాడు. న‌ష్ట‌ప‌రిహారంగా త‌న పారితోషికంలో కొంత మొత్తాన్ని లారెన్స్ తిరిగి ఇవ్వాల్సివచ్చింది. ఈ త‌ల‌నొప్పుల‌న్నీ… బండ్ల తప్పించుకోగ‌లిగాడు.
