బెల్లంకొండ శ్రీ‌నివాస్‌, మంచు మ‌నోజ్‌, నారా రోహిత్ క‌లిసి ఓ సినిమా చేస్తున్నారు. త‌మిళంలో విజ‌య‌వంత‌మైన ‘గ‌రుడ‌న్`కి ఇది రీమేక్‌. విజ‌య్ క‌న‌క‌మేడ‌ల ద‌ర్శ‌క‌త్వం వ‌హిస్తున్నారు. ఈ చిత్రానికి ‘వీర ధీర శూర‌’ అనే టైటిల్ ప‌రిశీలిస్తున్నారు. ఈ చిత్రంలో క‌థానాయిక‌గా అతిథి శంక‌ర్ ని ఎంచుకొన్నారు. అతిథి ఎవ‌రో కాదు.. ద‌ర్శ‌కుడు శంక‌ర్ కుమార్తె. త‌ను మంచి గాయ‌ని కూడా. వ‌రుణ్ తేజ్ న‌టించిన ‘గ‌ని’లో ఓ పాట కూడా పాడింది. ఎంబీబీఎస్ చేసింది. ఇప్పుడు న‌టిగా త‌న అదృష్టాన్ని ప‌రీక్షించుకోబోతోంది. తెలుగులో ఆమెకు ఇదే తొలి సినిమా.

ప్ర‌స్తుతం హైద‌రాబాద్ లో షూటింగ్ జ‌రుగుతోంది. అతిథి కూడా సెట్లో అడుగు పెట్టింది. ఈ సినిమాలో మ‌రో హీరోయిన్ కూ ఛాన్సుంది. ఆ మె పేరు త్వ‌ర‌లో ప్ర‌క‌టిస్తారు. ముగ్గురు స్నేహితుల క‌థ ఇది. స్నేహం, స్వార్థం, ప్ర‌తీకారం నేప‌థ్యంలో సాగుతుంది. మ‌రోవైపు బెల్లంకొండ శ్రీ‌నివాస్ ‘టైస‌న్ నాయుడు’ సినిమాని పూర్తి చేస్తున్నాడు. ‘కిష్కింద పురి’ అనే సినిమా కూడా సెట్స్ పై ఉంది. లుధీర్ బై రెడ్డి ద‌ర్శ‌క‌త్వంలో ఓ సినిమా చేస్తున్నాడు. దీనికి ‘హైంద‌వ‌’ అనే టైటిల్ ప‌రిశీల‌న‌లో వుంది.