‘ఆర్‌.ఎక్స్ 100’తో గుర్తింపు తెచ్చుకొన్న హీరో కార్తికేయ‌. అయితే ఆ త‌ర‌వాత ఆ స్థాయి విజ‌యాన్ని అందుకోలేక‌పోయాడు. ఆమ‌ధ్య వ‌చ్చిన `బెదురులంక‌` కాస్త బెట‌ర్ సినిమాగా నిలిచింది. ఇప్పుడు యూవీ క్రియేష‌న్స్‌లో కార్తికేయ ఓ సినిమా చేస్తున్నాడు. ప్ర‌శాంత్ రెడ్డి ద‌ర్శ‌కుడు. ఈ చిత్రానికి ‘భ‌జే వాయు వేగం’ అనే టైటిల్ ఫిక్స్ చేశారు. ఈరోజు.. టైటిల్ గ్లింప్స్‌ని వ‌దిలారు. ఆంజ‌నేయుడి వేగాన్ని గాలితో పోలుస్తూ ఇలా `భ‌జే వాయు వేగం` అంటూ స్థుతిస్తారు. దాన్ని… టైటిల్ గా మార్చుకొన్నారు. విన‌గానే ఎక్కేసే ప‌వ‌ర్ ఫుల్ టైటిల్ ఇది. క‌థ కూడా వేగానికి సంబంధించిన‌దే. దానికి అనువుగానే టైటిల్ గ్లింప్స్ రూపొందించారు. స్పీడుగా దూసుకుపోయే కారు, డిక్కీలో డ‌బ్బుల మూట‌లు.. దీన్ని బ‌ట్టి క‌థ ఏ జోన‌ర్‌లో సాగుతుందో అర్థం చేసుకోవొచ్చు. యూవీ సినిమా కాబ‌ట్టి క్వాలిటీలో రాజీ ఉండ‌దు. మేకింగ్ పెద్ద సినిమాల‌కు త‌గ్గ‌ట్టుగానే ఉండ‌బోతోంది. కార్తికేయ స‌ర‌స‌న ఐశ్వ‌ర్య మీన‌న్ క‌థానాయిక‌గా న‌టిస్తోంది. ర‌థ‌న్ సంగీతాన్ని అందిస్తున్నారు. షూటింగ్ కూడా పూర్తయ్యింది. త్వ‌ర‌లోనే ట్రైల‌ర్ విడుద‌ల చేసి, రిలీజ్ డేట్ ని అధికారికంగా ప్ర‌క‌టిస్తారు.