‘ఆహా’లో వ‌చ్చిన ‘భామాక‌లాపం’ డీసెంట్ హిట్ గా నిలిచింది. అప్ప‌ట్లోనే నాలుగు మిలియ‌న్ల వ్యూస్ సాధించి రికార్డ్ సృష్టించింది. ఓ సాధార‌ణ గృహిణి అత్యుత్యాహం ఎన్ని ర‌కాల ఇబ్బందుల‌కు గురి చేసిందో.. స‌ర‌దాగా, ఆస‌క్తిక‌రమైన మ‌లుపుల‌తో చెప్పిన వెబ్ మూవీ అది. ఇప్పుడు ‘భామా క‌లాపం 2’ కూడా సిద్ధ‌మైంది. ఈనెల 16 నుంచి ‘ఆహా’లోనే స్ట్రీమింగ్ కానుంది. ప్రియ‌మ‌ణి, సీర‌త్ క‌పూర్‌, శ‌ర‌ణ్య, బ్ర‌హ్మాజీ కీల‌క పాత్ర‌ల్లో న‌టించారు. ట్రైల‌ర్ ఈ సినిమాపై మ‌రింత ఆస‌క్తిని పెంచింది.
అనుప‌మ (ప్రియ‌మ‌ణి) పాత్ర‌ని ఈ సీక్వెల్ లో మ‌రింత క్రేజీగా తీర్చిదిద్దిన‌ట్టు అర్థం అవుతోంది. తొలి భాగం హిట్ట‌వ్వ‌డంతో సీక్వెల్ స్పాన్ కూడా పెంచారు. మేకింగ్ లో క్వాలిటీ క‌నిపించింది. ఈ క‌థ‌లో క్రైమ్ ఎలిమెంట్స్ చాలానే చోటు చేసుకొన్నాయి. ప్రియ‌మ‌ణి, శ‌ర‌ణ్య ఓ దోపిడీకి పూనుకోవ‌డం, అందుకోసం స్కెచ్ వేయ‌డం ఇవ‌న్నీ ఆస‌క్తి క‌లిగించాయి. ఓ సాధార‌ణ గృహిణి, ఓ అసాధార‌ణ దోపిడీకి ఎందుకు పూనుకొంది? అనేది ఓ స‌స్పెన్స్ ఎలిమెంట్‌. ”70 ఎం.ఎంలో మ‌హా భార‌తం చూపించావే.. క్యారెక్ట‌రే కాస్త క‌న్‌ఫ్యూజింగ్‌గా ఉంది. నువ్వు స‌త్య‌వ‌తివా, కుంతివా, లేక శిఖండివా” అని అడిగితే.. ”ఒక మామూలు హౌస్ వైఫే సార్‌..” అంటూ ప్రియ‌మ‌ణి అమాయ‌కంగా చెప్ప‌డం ఈ ట్రైల‌ర్‌లో ఆక‌ట్టుకొనే మ‌రో అంశం. ప్రియ‌మ‌ణి ఉత్త‌మ న‌టిగా జాతీయ అవార్డు సాధించిన సంగ‌తి గుర్తుండే ఉంటుంది. ఆ విష‌యాన్ని ఈ ట్రైల‌ర్‌లో మ‌రోసారి గుర్తు చేసే ప్ర‌య‌త్నం చేశారు ఓ చిన్న డైలాగ్ తో. మొత్తంగా చూడాల‌నిపించే ఆస‌క్తికి క‌లిగించ‌డంలో.. ట్రైల‌ర్ పాస్ అయిపోయింది. ఇక ప్రేక్ష‌కుల తీర్పే మిగిలి వుంది.
