మ‌న‌కున్న ప్ర‌తిభావంతులైన సంగీత ద‌ర్శ‌కుల్లో భీమ్స్ ఒక‌డు. ‘ధ‌మాకా’తో.. త‌న కెరీర్ టర్న్ అయ్యింది. ఈ సినిమాలో పాట‌ల‌న్నీ హిట్టే. ఆ త‌ర‌వాత వ‌చ్చిన… ‘మ్యాడ్‌’ సినిమాలోనూ పాట‌లు కిర్రాక్ పుట్టించాయి. ఇటీవ‌ల విడుద‌లైన ‘టిల్లు స్క్వేర్‌’ సినిమాకి భీమ్స్ నేప‌థ్య సంగీతం అందించాడు. అలా త‌న ఖాతాలో మ‌రో హిట్ వేసుకొన్నాడు. ఈ సినిమాల‌తో భీమ్స్ రేంజ్ పెరిగిపోయింది. ఇంత‌కు మందు కూడా భీమ్స్ కొన్ని హిట్ సాంగ్స్ అందించాడు. అయితే ఆ సినిమాలేం స‌రిగా ఆడ‌లేదు. దాంతో భీమ్స్‌కు మైలేజీ రాలేదు. ‘ధ‌మాకా’, ‘మ్యాడ్‌’ హిట్ట‌వ్వ‌డంతో భీమ్స్ ప‌నిత‌నం తెలిసొచ్చింది. ఇప్పుడు ఓ పెద్ద ఆఫ‌ర్ అందింది.
వెంక‌టేష్ – అనిల్ రావిపూడి కాంబినేష‌న్‌లో ఓ సినిమా రూపుదిద్దుకొంటున్న సంగ‌తి తెలిసిందే. ఈ ఉగాదిన లాంఛ‌నంగా ప్రారంభం కానుంది. ఈ చిత్రానికి భీమ్స్ సంగీతం అందించ‌నున్నాడు. ఈ చిత్రం కోసం రూ.2 కోట్ల పారితోషికం కూడా భీమ్స్ అందుకోబోతున్నాడ‌ట. వెంక‌టేష్ లాంటి అగ్ర హీరో సినిమాకి, అందునా క్రేజీ కాంబినేష‌న్‌కి ప‌ని చేయ‌డం భీమ్స్ కెరీర్‌లో టర్నింగ్ పాయింటే. ఈ సినిమాతో భీమ్స్ కూడా బిగ్ లీగ్‌లోకి చేరిన‌ట్టైంది. భీమ్స్‌కు మాస్ ప‌ల్స్ తెలుసు. దానికి తోడు ఫోక్‌పై మంచి ప‌ట్టుంది. ఆ త‌ర‌హా పాట‌లు వెంకీ సినిమాకి చాలా అవ‌స‌రం అట. అందుకే భీమ్స్‌ని ఎంచుకొన్నారు. ఇప్ప‌టికే పాట‌ల రికార్డింగ్ ప‌నులు కూడా మొద‌ల‌య్యాయ‌ని స‌మాచారం.
