న‌కిలీ, డా.స‌లీమ్‌, బిచ్చ‌గాడు… ఇలా వెరైటీ క‌థ‌లు ఎంచుకొని షాక్ ఇస్తున్నాడు విజయ్ అంథోనీ. స్వ‌త‌హాగా సంగీత దర్శ‌కుడైనా న‌టుడిగా ఈ సినిమాలు త‌న‌కంటూ ఓ ప్ర‌త్యేక క్రేజ్ తీసుకొచ్చాయి. బిచ్చ‌గాడు వ‌సూళ్లు చూసి… టాలీవుడ్ అవాక్క‌య్యింది. విజయ్ చేస్తున్న తమిళ సినిమాల‌కు ఇప్పుడు తెలుగు రైట్స్ కోసం క్యూ మొద‌లైంది. అయితే విజయ్ మాత్రం త్వ‌ర‌లోనే తెలుగులో ఓ సినిమా చేయ‌బోతున్నాడు. హీరోగా కాదు.. ద‌ర్శ‌కుడిగా. ఆమ‌ధ్య వెంక‌టేష్‌ని క‌ల‌సి ఓ క‌థ వినిపించాడు విజయ్. క‌థ‌లో ఫ్రెష్ నెస్‌, సింపుల్‌సిటీ న‌చ్చి వెంకీ కూడా ఓకే చెప్పేశాడు. కానీ.. ఆ సినిమా ప‌ట్టాలెక్కేదెప్పుడో వెంకీ చెప్ప‌లేదు. బాబు బంగారం త‌ర‌వాత రెండు మూడు స్క్రిప్టులు సిద్ధం చేయించాడు వెంకీ. ఆ జోరులో విజయ్ క‌థ సంగ‌తి దాదాపుగా మ‌ర్చిపోయాడ‌ని టాక్.
అయితే బిచ్చ‌గాడు వ‌సూళ్ల గురించి తెలుసుకొన్న వెంకీ.. ఇప్పుడు విజ‌య్‌ని లైన్లోకి ర‌ప్పించాడ‌ట. ”క‌థ సిద్దం చేసేయ్‌… మ‌న సినిమా త్వ‌ర‌గా మొద‌లెట్టేద్దాం” అని విజ‌య్‌ని తొంద‌ర‌పెడుతున్నాడ. బాబు బంగారం త‌ర‌వాత విజయ్ అంథోని సినిమానే ఉండొచ్చ‌న్న టాక్ వినిపిస్తోంది. విజయ్ సినిమాలు సీరియ‌స్ గాసాగుతాయి. అయితే.. వెంకీ సినిమాలో కామెడీ కూడా ఆశిస్తారు. అందుకే ‘కామెడీ ట‌చ్ ఉండేలా చూడు’ అంటూ ఒకే ఒక్క ష‌ర‌తు విధించాడ‌ట వెంకీ. మ‌రి దానికి విజయ్ ఏమంటాడో? ఈ విష‌యంలో ఇద్ద‌రూ ఓ అండ‌ర్‌స్టాండింగ్‌కి వ‌స్తే. ఈ సినిమా అతి తొంద‌ర్లోనే ప‌ట్టాలెక్కేయ‌డం ఖాయం.
