“త్రిపురలో ఐదేళ్ల క్రితం.. మాకు ఒక్క సీటు లేదు.. ఇప్పుడు ప్రభుత్వాన్ని ఏర్పాటు చేశాం. ఆంధ్రప్రదేశ్‌లోనూ అదే జరుగుతుంది..” తెలుగుదేశం పార్టీ.. ఎన్డీఏ నుంచి బయటకు వచ్చిన తర్వాత బీజేపీ ప్రధాన కార్యదర్శి రామ్‌మాధవ్ అన్న మాటలు ఇవి. ఈ మాటలు చెప్పిన చాలా కాలానికి కార్యాచరణ ప్రారంభించారు. త్రిపుర విజయంలో కీలక పాత్ర పోషించినట్లు ప్రచారం పొందిన సునీల్ ధియోదర్ అనే వ్యక్తికి ఆంధ్రప్రదేశ్‌కి కో ఇన్చార్జ్‌గా నియమించారు. అసలు ఇన్చార్జ్‌గా మురళీధరన్ అనే నేత వ్యవహరిస్తారు. సునీల్ ధియేదర్ ను కో ఇన్చార్జ్‌గా నియమించడంతో.. ఆటోమేటిక్‌గా ప్రచారం జరుగుతుంది. ఏపీని త్రిపురను చేస్తామని బీజేపీ నేతలు ప్రకటనలు చేస్తారు. ఇక అంతా రోటీన్‌గా సాగిపోతుంది.
సునీల్ దియోదర్ నరేంద్రమోడీకి సన్నిహితుడు. 2014 పార్లమెంట్ ఎన్నికల్లో మోడీకి వారణాసిలో ఎన్నికల మేనేజర్‌గా పని చేశారు. ఆ తర్వాత త్రిపురకు మకాం మార్చారు. అక్కడ పార్టీ కోసం పని చేశారు. ఈ ఆరెస్సెస్ నేత.. తెర వెనుక వ్యూహాలు రచించడంతో దిట్టగా పేర్కొంటారు. త్రిపురలో బూత్‌ల వారీగా ఆయన వేసిన ప్రణాళికలే.. స్వల్ప తేడాతో అయినా కొన్ని స్థానాల్లో బీజేపీ విజయం సాధించిందంటారు. ఆరెస్సెస్‌లో ఉన్నప్పుడే మోడీకి బాగా పరిచయం. అందుకే.. ఆయనను గుజరాత్‌లోనూ ఉపయోగించుకున్నారు మోడీ. కాంగ్రెస్ కు పట్టు ఉన్న జిల్లాల్లో ఆయనకు బాధ్యతలు అప్పగించేవారు. 2013లో దక్షిణ డిల్లీకి ఇంచార్జ్‌గా ఉన్నారు. 2014లో మహారాష్ట్రలో పని చేశారు.
అయితే ధియోదర్ ఎక్కడ పని చేసినా.. బీజేపీకి సంస్థాగతంగా బాగా కలసి వచ్చిన అంశాలు ప్లస్‌గా మారాయి. దక్షిణాదిలో ఆ పరిస్థితి లేదు. అందుకే రామ్ మాధవ్ మాటలను ఎవరూ పరిగణనలోకి తీసుకోలేదు. సునీల్‌కు క్రెడిట్ కట్టబెట్టేసిన త్రిపురలో ఉండేది పాతిక లక్షల మంది ఓటర్లు. అక్కడ యాభై వేల మందికిపై ఫుల్ టైమర్లను దింపి.. ఆరు నెలల ముందు నుంచి కార్యాచరణ రెడీ చేసుకున్నారు. కొన్ని వందల కోట్లు ఖర్చు పెట్టారన్న ప్రచారం కూడా ఉంది. కానీ ఏపీలో ఐదు కోట్ల మంది ఓటర్లు ఉన్నారు. ఆరెస్సెస్ లేదు. బీజేపీ క్యాడర్ లేదు. అందుకే బీజేపీ అతిశయోక్తులు చెబుతోందనుకున్నారు. కానీ బీజేపీ సునీల్ ధియోదర్ నియామకంతో బీజేపీ కాస్త సీరియస్‌గానే ఉందనే ఏభావన తెప్పించే ప్రయత్నం చేసింది.
