అక్కినేని జాతీయ అవార్డు 2018 – దివంగ‌త న‌టి శ్రీ‌దేవికి ప్ర‌క‌టించిన సంగ‌తి తెలిసిందే. ఆమె త‌ర‌పున ఈ అవార్డుని బోనీకపూర్ అందుకున్నారు. వేదిక‌పై వ‌క్త‌లు శ్రీ‌దేవి గురించి మాట్లాడిన‌ప్పుడ‌ల్లా ఆయ‌న కన్నీటి ప‌ర్యంత‌మ‌య్యారు. అవార్డు అందుకున్న త‌ర‌వాత త‌న స్పంద‌న తెలియ‌జేస్తూ.. క‌న్నీరు పెట్టుకున్నారు. ఆమె జ్ఞాప‌కాల‌తో మాట్లాడ‌కుండానే ఆయ‌న నిష్కమించారు.
శ్రీ‌దేవికి సంబంధించిన జ్ఞాప‌కాలు కొన్ని నాగార్జున పంచుకున్నారు. “శ్రీ‌దేవిగారితో 4 సినిమాలు చేశాను. తొలి సినిమా ఆఖ‌రి పోరాటం చేస్తున్న‌ప్పుడు నాకు బాగా గుర్తు. ఆమె వ‌చ్చిన‌ప్పుడ‌ల్లా సెట్లో అంద‌రూ లేచి నిల‌బ‌డేవారు. ఆఖ‌రికి రాఘ‌వేంద్ర‌రావు గారు కూడా నిల‌బ‌డేవారు. మీరెందుకు నిల‌బ‌డ్డారు. ఆమె మీకు ముందు నుంచీ తెలుసు క‌దా అనేవాళ్లం. కానీ ఆయ‌న మాత్రం `త‌ను దేవ‌త` అంటుండేవారు. నిజంగానే శ్రీ‌దేవి దేవ‌త..” అంటూ ఆమె జ్ఞాప‌కాల్ని గుర్తు చేసుకున్నారు.
