ఈవారం బాక్సాఫీసు ద‌గ్గ‌ర చిన్న సినిమాలు ఢీ కొట్ట‌బోతున్నాయి. అందులో ఒక‌టి హారర్ కామెడీ అయితే.. మ‌రోటి యాక్షన్ థ్రిల్ల‌ర్‌. మూడోది ప్రేమ‌క‌థ.
రాజుగారి గ‌దితో హిట్టు కొట్టిన ఓంకార్ ‘రాజుగారి గ‌ది 3’ తీశాడు. ఈసారి భ‌య‌పెట్టే బాధ్య‌త‌ని అవికా గోర్‌పై వేశాడు. అవికా తెలుగు సినిమాల‌కు దూర‌మై చాలా రోజులైంది. త‌మ‌న్నా చేయాల్సిన పాత్ర‌ని అవికాకి ఇచ్చి – షాక్ ఇచ్చాడు ఓంకార్. త‌న త‌మ్ముడు అశ్విన్ బాబుని హీరోగా ప్ర‌మోట్ చేయ‌డానికి ఈ సినిమా చేస్తున్నాన‌ని కూడా చెప్పాడు. ట్రైల‌ర్లు ఆస‌క్తిక‌రంగానే ఉన్నాయి. హారర్, కామెడీ ఎలిమెంట్స్ వ‌ర్క‌వుట్ అయితే… ఓంకార్ ఖాతాలో మ‌రో హిట్టు ప‌డుతుంది. టెక్నిక‌ల్‌గా పేరొందిన వాళ్ల‌ని తీసుకోవ‌డం ఓంకార్ కి ప్ల‌స్‌. పైగా… మంచి కామెడీ గ్యాంగ్ ఉంది. రాజుగారి గ‌ది ఇది వ‌ర‌క‌టి సినిమాలు బాగా ఆడ‌డంతో.. ప్రేక్ష‌కులు ఈ సినిమాపై ఫోక‌స్ పెడ‌తారు. దానికి తోడు ప్ర‌మోష‌న్లు కూడా బాగానే చేశారు.
ఈ సినిమాతో పోటీ ప‌డుతున్న ఆది సాయికుమార్ చిత్రం ‘ఆప‌రేష‌న్ గోల్డ్ ఫిష్’. సాయికిర‌ణ్ అడ‌వి ఈ చిత్రానికి ద‌ర్శ‌కుడు. కశ్మీరీ పండిట్స్ నేప‌థ్యంలో సాగే సినిమా ఇది. ఉగ్ర‌వాదం, యాక్షన్.. ఇవ‌న్నీ మేళ‌వించారు. ర‌చ‌యిత అబ్బూరి ర‌వి ప్ర‌తినాయ‌కుడిగా న‌టించ‌డం విశేషం. ఈ సినిమాకి పని చేసిన న‌టీన‌టులు, సాంకేతిక నిపుణులు పారితోషికం తీసుకోలేదు. ఈ సినిమా ద్వారా వ‌చ్చిన ల‌భాల్ని మాత్రం అంతా క‌లిసి పంచుకుంటారు. ప్లాన్ బాగానే ఉంది.. కానీ ప్ర‌మోష‌న్లు మాత్రం బాగా వీక్‌గా ఉన్నాయి. అస‌లు ఈ సినిమా ఒక‌టొస్తుంద‌న్న విష‌య‌మే జ‌నాల‌కు తెలియ‌డం లేదు. అంతా గ‌ప్ చుప్ వ్య‌వ‌హారాలే. క‌నీసం ఆది సాయికుమార్ కూడా మీడియా ముందుకు రాలేదు. తెర వెనుక ఏం జ‌రిగిందో మ‌రి.
ఈ రెండు సినిమాల‌తో మ‌రో చిన్న సినిమా ‘మ‌ళ్లీ మ‌ళ్లీ చూశా’ పోటీ ప‌డుతోంది. ఇదో ల‌వ్ స్టోరీ. అనురాగ్, శ్వేత జంట‌గా న‌టించారు. హేమంత్ కార్తీక్ ద‌ర్శ‌క‌త్వం వ‌హించారు. ప్ర‌చార చిత్రాలు ప్రామిసింగ్‌గానే ఉన్నాయి. ఈ రోజుల్లో ఏ సినిమాలో ఎంత మేట‌రుందో అంచ‌నా వేయ‌డం క‌ష్టం. విడుద‌ల‌య్యాక స‌త్తా ఉంటే నిల‌బ‌డిపోతుంటాయి. మ‌రి.. మ‌ళ్లీ మ‌ళ్లీ చూసేలా ఈ సినిమాలో ఏముందో తెలియాలంటే ఇంకొన్ని గంట‌లు ఆగాలి.
