బోయ‌పాటి శ్రీ‌ను అంటే… అగ్ర హీరోలు కూడా డేట్లు ఇచ్చేయ‌డానికి రెడీ ఉంటారు. అయితే… స్నేహ ధ‌ర్మం కోస‌మో, ముందు ఇచ్చిన మాట కోసమో బెల్లం కొండ శ్రీ‌నివాస్ తో సినిమాకి క‌మిట్ అయ్యాడు బోయ‌పాటి. ఈ సినిమాపూర్త‌యిపోయింది. నెక్ట్స్ ఏంట‌న్న సందిగ్థం మొద‌లైంది. బోయ‌పాటి అంటే పెద్ద హీరోలు రెడీగా ఉంటారు స‌రే.. కానీ హీరోలు అందుబాటులో ఉండాలిగా. అగ్ర క‌థానాయ‌కులంతా వారి వారి సినిమాల‌తో బిజీ. వాళ్ల‌తో సినిమా చేయ‌డానికి బోయ‌పాటి కొంత‌కాలం ఎదురు చూడాల్సింది. మ‌హేష్ బాబుతో ఓ సినిమా చేయాల‌ని బోయ‌పాటి ఎప్ప‌టి నుంచో అనుకొంటున్నాడు. మ‌హేష్ కూడా సిద్ధంగానే ఉన్నాడు. కానీ క‌నీసం మ‌హేష్ ద‌గ్గ‌ర క‌థ విన‌డానికి కూడా ఖాళీ లేదు. మ‌హేష్‌తో సినిమా అంటే మ‌రో రెండేళ్లు ఆగాలి.

చిరు 152వ సినిమా బోయ‌పాటితో అనుకొన్నారు. కానీ… ముందు ఉయ్యాల‌వాడ పూర్త‌వ్వాలి క‌దా?

చిరుతోనే సినిమా చేయాలంటే బోయ‌పాటి మ‌రో యేడాది ఆగాలి. బాల‌య్య 103వ సినిమా బోయ‌పాటితోనే. కానీ.. దానికీ టైమ్ ఉంది. ఇక బోయ‌పాటి ద‌గ్గ‌ర ఉన్న ఏకైక ఆప్ష‌న్ అఖిల్ మాత్ర‌మే. విక్ర‌మ్ కె.కుమార్ సినిమా ఈ యేడాది చివ‌ర్లో విడుద‌ల అవుతుంది. జ‌న‌వ‌రి త‌ర‌వాత అఖిల్ ఖాళీనే. ఈలోగా బోయ‌పాటి క‌థ సిద్ధం చేసుకోవొచ్చు. సో.. అఖిల్‌తో ఫిక్స‌యితే… బోయ‌పాటికి ఎవ‌రి కోస‌మూ టైమ్ వేస్ట్ చేసుకోవాల్సిన ఉండ‌దు. సో.. అఖిల్ – బోయ‌పాటి కాంబో ఫిక్స‌యిన‌ట్టే.